1 րոպեի ընթերցում
ԵՐԵՎԱՆ, 11 ՀՈԻԼԻՍԻ, ԱՐՄԵՆՊՐԵՍ: Անկարայի առաջին ատյանի քրեական դատարանն անմեղ է ճանաչել Սուլեյման Յեշիլյուրթին, ում դեմ դատական հայց էր ներկայացրել Թուրքիայի գլխավոր ընդդիմադիր կուսակցության նախագահ Քեմալ Քըլըչդարօղլուն` իրեն հայ անվանելու համար: Ինչպես հաղորդում է «Արմենպրես»-ը` վկայակոչելով թուրքական Turkiye Gazetesi պարբերականը, դատական նիստի ժամանակ Յեշիլյուրթը նշել է, որ գրքում տեղ գտած նյութերը հիմնված են փաստաթղթերի վրա:
Դատավորը գիրքը համարել է «խոսքի ազատության շրջանակներում» գրված ստեղծագործություն և անմեղ է ճանաչել թուրք հեղինակին:
Սուլեյման Եշիլյուրթի «Դերսիմցի հայ Եմուշ խանումի որդի ինժեներ Քեմալը» գրքում նշվում է, որ Թունջելիում (նախկին Դերսիմ) ծնված Քըլըչդարօղլուի մայրը հայ է, ինչը Թուրքիայում համարվում է «վիրավորանք»: Իր հայցում Քեմալ Քըլըչդարօղլուն պահանջել է դատարանից 100 000 լիրա փոխհատուցում (ավելի քան 63 հազար ԱՄՆ դոլար): Քըլըչդարօղլուն հայտարարել էր, որ հայ լինելն ամոթ չէ, սակայն ինքը հայ չէ` ընդգծելով, որ այսուհետ լուրջ պայքար է մղելու մամուլում այդ մասին հրապարակումների դեմ: