1 րոպեի ընթերցում
ԵՐԵՎԱՆ, 3 ՀՈՒՆԻՍԻ, ԱՐՄԵՆՊՐԵՍ: Վանում 2011 թ. հոկտեմբերի 23-ին տեղի ունեցած 7.2 ուժգնությամբ երկրաշարժի հետեւանքով անօթեւան է մնացել 20 հազար ընտանիք: Ինչպես հաղորդում է «Արմենպրես»-ը` վկայակոչելով թուրքական «Զաման» թերթը, այս տվյալը հրապարակել է Թուրքիայի կառավարության բազմաբնակարան շենքերի վարչությունը:
Երկրաշարժը բնակության համար ոչ պիտանի է դարձրել Վանի բնակֆոնդի 90 տոկոսը: Վանի բնակչությունը երկրաշարժից հետո հեռացել է քաղաքից: Թեեւ թուրքական կառավարությունը միջազգային կազմակերպությունների օգնությամբ ժամանակավոր տնակային քաղաք է Վանում ստեղծել, այնուհանդերձ, քաղաքում գրեթե ամեն օր տեղի ունեցող հետցնցումների պատճառով, նախկին բնակչության մեծ մասը չի ցանկանում վերադառնալ:
Թուրքիայի կառավարությունը հայտարարել է, որ ձեռնարկելու է ամեն միջոց Վանը վերականգնելու համար:-