1 րոպեի ընթերցում
ԳՅՈՒՄՐԻ, 15 ՆՈՅԵՄԲԵՐԻ, ԱՐՄԵՆՊՐԵՍ: Շիրակի մարզի հանրակրթական 148 դպրոցներում իրականացվում է ՄԱԿ-ի Պարենի համաշխարհային ծրագրի շրջանակներում իրականացվող դպրոցական «Տաք սնունդ» նախագիծը: Ծրագիրը ընթացիկ տարվա ապրիլից մինչ օրս դպրոցում սնվելու հնարավորություն է տալիս տարրական դասարանների ավելի քան 11 հազար 200 աշակերտի:
Նշենք, որ ծրագրի շրջանակներում դպրոցներին տրամադրվում է ալյուր, ձեթ եւ ընդեղեն: Դպրոցները, սննդի բազմազանության համար, կարող են նաեւ փոխանակում իրականացնել: Որպես ծրագրի իրականացման պարտադիր պայման' ՄԱԿ-ի կողմից տրամադրվող սննդի 70 տոկոսին զուգահեռ Ծնողական խորհուրդը պետք է կատարի եւս 30 տոկոս ներդրում: Ինչպես «Արմենպրես»-ի' Շիրակի թղթակցին տեղեկացրեց ծրագրի համակարգող Սամվել Մարտիրոսյանը, սնունդը տրամադրվում է միայն այն դպրոցներին, որոնք ունեն խոհանոցային անհրաժեշտ պայմաններ: Ծրագրում չեն ընդգրկվել նաեւ ավագ դպրոցները, որոնք չունեն տարրական դասարաններ: