1 րոպեի ընթերցում
ԵՐԵՎԱՆ, 28 ՀՈԿՏԵՄԲՆԵՐԻ, ԱՐՄԵՆՊՐԵՍ: Ջերմուկ քաղաքը մինչեւ նոյեմբերի կեսերը կունենա արտաքին լուսավորման նոր համակարգ, ինչը նպատակաուղղված է քաղաքը միջազգային չափորոշիչներին համապատասխանող զբոսաշրջության կենտրոն դարձնելու` Կառավարության որոշման իրականացմանը:
Ինչպես տեղեկացնում է «Հայաստանի Էլեկտրական ցանցեր» ընկերությունը, «Ջերմուկ գրուպ» ընկերության, «Ջերմուկ հայաթ» հյուրանոցի եւ ընդունելությունների տան միացման կապակցությամբ իրականացվում են 35/110 կՎ ենթակայանի վերակառուցման աշխատանքներ` 5.5 ՄգՎՏ հզորություն ապահովելու նպատակով: Այդ նպատակով «ՀԷՑ»- ը փոխարինում է ենթակայանի տրանսֆորմատորը, ինչպես նաեւ 6(10) սարքավորումները` նոր վակուումային անջատիչներով եւ թվային ռելեական պաշտպանությամբ:
Հիշեցնենք, որ ընկերության դրամական օգնությունը, որ տրամադրվել է Ջերմուկ քաղաքի սոցիալ-տնտեսական զարգացման աջակցող հիմնադրամին, 300 մլն դրամ է կազմում: Հին ենթակառուցվածքն արդեն ամբողջությամբ ապամոնտաժվել է, տեղադրվել են նոր լուսատուներ` ինչպես տեղական, այնպես էլ արտասահմանյան արտադրության: