2 րոպեի ընթերցում
ԳՅՈՒՄՐԻ, 18 ՀՈԿՏԵՄԲԵՐԻ, ԱՐՄԵՆՊՐԵՍ: Գյումրու Ավստրիական մանկական հիվանդանոցը հագեցվել է ժամանակակից բժշկական սարքավորումներով: Ինչպես «Արմենպրես»-ի Շիրակի մարզի թղթակցին տեղեկացրեց հիվանդանոցի գլխավոր բժիշկ Աշոտ Կուրղինյանը, սարքավորումները ձեռք են բերվել տարբեր ֆինանսական աղբյուրներով:»Առաջինը' ավստրիական կողմն է, որի շարունակական համագործակցության ծրագրում ներառված է նաեւ նոր բժշկական սարքավորումների ձեռքբերումը: Դա մոտ քսան հազար եվրո արժողությամբ տարաբնույթ սարքավորումներ են' ավտոկլավ, լաբորասկոպիկ վիրաբուժական գործիքներ եւ այլն: Բացի այդ, համագործակցելով Երեւանի «Կոնցեռն էներգոմաշ» ընկերության հետ եւ ավստրիական կողմի երաշխավորությամբ' ձեռք է բերվել իմունաֆերմետատիվ անալիզատոր սարքավորումը, որն իրականացնում է բոլոր տեսակի հետազոտություններ»,-նշեց Աշոտ Կուրղինյանը:
Նշենք, որ ի տարբերություն մի շարք այլ անալիզատորների, իմունաֆերմետատիվ այս անալիզատորի հետազոտման արդյունքները պարզվում են 15 րոպե անց'գրանցելով ախտորոշման 100 տոկոսանոց արդյունք: Ճապոնիայում արտադրված սարքի արժեքն է 28 հազար եվրո: Այս ընթացքում վերապատրաստվել է նաեւ այս սարքից օգտվող մասնագետը:
«Սարքը շատ հզոր է եւ իր կարողություններով բավարարում է ոչ միայն Ավստրիական մանկական հիմվանդանոցի, այլեւ Շիրակի մարզի բոլոր հիվանդանոցների կարքիները»,-ասաց Աշոտ Կուրղինյանը: