368.45
ՀՀ անկախության 20-ամյակին նվիրված միջոցառումներ` եվրոպական մի շարք երկրներում
2 րոպեի ընթերցում
ԵՐԵՎԱՆ, 17 ՍԵՊՏԵՄԲԵՐԻ, ԱՐՄԵՆՊՐԵՍ: Առաջիկա օրերին ՀՀ անկախության 20-ամյակին նվիրված միջոցառումներ կանցկացվեն եվրոպական մի շարք երկրներում: Ինչպես «Արմենպրես»-ին տեղեկացրին Եվրոպայի Հայ դատի հանձնախմբից, տոնական միջոցառումներ են կազմակերպվելու Ֆրանսիայում, Գերմանիայում, Բելգիայում, Նիդերլանդներում, Հունաստանում եւ այլուր:
Նիդերլանդներում տոնական միջոցառումներն անցկացվելու են այդ երկրում Հայաստանի դեսպանատան հովանու ներքո: Նախ մայրաքաղաք Ամստերդամում ելույթ կունենա Հայաստանի երիտասարդական նվագախումբը' դիրիժոր Սերգեյ Սմբատյանի ղեկավարությամբ: Իսկ սեպտեմբերի 24-ին հայկական համայնքը հավաքվելու է Հոլանդիայի Հայ տանը, որտեղ կհնչեն տոնական եւ ազգագրական երգեր, իսկ հյուրերը հնարավորություն կունենան համտեսել ավանդական խորոված: Նույն նվագախումբը համերգ կտա նաեւ Բելգիայի մայրաքաղաք Բրյուսելում, որտեղ տոնական միջոցառումները հովանավորում են Բելգիայի Թագավորությունում ՀՀ դեսպանատունը, ԵՄ-ում եւ ՆԱՏՕ-ում ՀՀ ներկայացուցչությունները:
Ինչպես ավելի վաղ տեղեկացրել էր «Արմենպրես»-ը, սեպտեմբերի 25-ին Փարիզում համերգով հանդես կգա երգչուհի Նունե Եսայանը, որի համերգը եւս կնվիրվի ՀՀ անկախության 20-ամյակին:
Գերմանիայի Շտուտգարտ քաղաքում ՀՀ եւ ԼՂՀ անկախության նվիրված միջոցառումներ կանցկացվեն սեպտեմբերի 22-ին:
Հունաստանում ՀՀ դեսպանության նախաձեռնությամբ եւ այդ երկրում ՀՅԴ եւ ՌԱԿ կառույցների հետ համագործակցությամբ սեպտեմբերի 25-ին տեղի կունենա տոնական երեկո, որի ընթացքում համերգային ելույթով հանդես կգա երգիչ Արսեն Գրիգորյանը: Երեկոյին իրենց մասնակցությունը կբերեն նաեւ «Նաիրի» եւ «Նանոր» պարային խմբերը: Ողջունի խոսքով հանդես կգա Հունաստանում ՀՀ արտակարգ եւ լիազոր դեսպան Գագիկ Ղալաչյանը:
Բաժանորդագրվեք մեր ալիքին Telegram-ում