1 րոպեի ընթերցում
ԳՈՐԻՍ, 13 ՍԵՊՏԵՄԲԵՐԻ, ԱՐՄԵՆՊՐԵՍ: Երեկ երեկոյան Երեւան-Մեղրի միջպետական ճանապարհի Գորիս-Կապան հատվածի 10-րդ կիլոմետրի վրա տեղի է ունեցել քարաթափում, ինչի հետեւանքով մայրուղին դարձել էր միակողմանի երթեւեկելի: Դեպքի վայր են մեկնել ճանապարհը սպասարկող Գորիսի «Ոսմար» ընկերության աշխատակիցները, որոնց ջանքերով քարերից եւ հողային զանգվածից մաքրվել է ճանապարհի 5 քառ. մ մակերեսով երթեւեկելի հատվածը: «Արմենպրես»-ի' Սյունիքի թղթակցին «Ոսմար» ընկերությունից տեղեկացրել են, որ երեկ ուշ երեկոյան' ժամը 23:00-ի սահմաններում, ճանապարհն ամբողջովին մաքրվել է, եւ վերականգնվել է երկկողմանի երթեւեկությունը: Վերացվել է նաեւ հետագա քարաթափման վտանգը: