1 րոպեի ընթերցում
ԿԱՊԱՆ, 22 ՕԳՈՍՏՈՍԻ, ԱՐՄԵՆՊՐԵՍ:Գարեգին Նժդեհի 125-ամյակի, նաեւ' Դավիթբեկյան ուխտերի ստեղծման 91-ամյակի առիթներով, օգոստոսի 23-25-ը «Նժդեհյան ցեղակրոն կուսակցությունը» եւ «Հայ արիներ» հայկազունների ազգային միավորումը կազմակերպել են ուխտագնացություն' դեպի Խուստուփ սար, որի ստորոտին ամփոփված են Գարեգին Նժդեհի մասունքները: Միջոցառմանը Կապանից կմասնակցեն նաեւ «Դավիթբեկյան ուխտեր» երիտասարդական հասարակական կազմակերպության անդամները: Ուխտագնացության առաջին օրը նախատեսված է Խուստուփի ստորոտին' Գ.Նժդեհի գերեզմանի մոտ, կատարել մատաղի արարողություն, իսկ հաջորդ օրը ուխտավորները կբարձրանան Խուստուփի գագաթը: Ուխտագնացությանը կմասնակցի 40-50 երիտասարդ' մայրաքաղաքից եւ հանրապետւթյան այլ վայրերից: