2 րոպեի ընթերցում
ԻՋԵՎԱՆ, 19 ՕԳՈՍՏՈՍԻ, ԱՐՄԵՆՊՐԵՍ: Այսօր ՀՀ աշխատանքի եւ սոցիալական հարցերի նախարարությունը, նախարար Արթուր Գրիգորյանի գլխավորությամբ, Տավուշի մարզպետարանում կազմակերպեց քաղաքացիների ընդունելություն: Մարզպետարանում հատկացվել էր չորս աշխատասենյակ, որոնցից յուրաքանչյուրում նախարարության համապատասխան վարչությունների ղեկավարները եւ պատասխանատուները լսեցին քաղաքացիների' աշխատանքի եւ զբաղվածության, հաշմանդամության, նպաստների եւ ավանդների, կենսաթոշակների վերաբերյալ դիմումները:
Դիմող քաղաքացիների թիվը հասնում էր մի քանի տասնյակի: Նրանց գերակշռող մասը ցանկանում էր պարզաբանումներ ստանալ նպաստներին եւ ավանդներին վերաբերող հարցերի շուրջ: Շատերն էլ իրենց հարցերը ցանկացան ուղղել անմիջապես նախարար Ա. Գրիգորյանին:
Մի շարք հարցերի վերաբերյալ քաղաքացիներին տեղում տրվեց սպառիչ պատասխան: Նախարարության աշխատակիցները հայտնաբերեցին թերացումներ սոցիալական ոլորտի մարզային եւ տարածքային կառույցներում, եւ մի շարք ընտանիքների համար վերականգնվեց ընտանեկան նպաստ, կենսաթոշակ կամ ավանդ ստանալու իրավունքը:
Օրենքի սահմաններում աջակցություն ցուցաբերվեց նաեւ հաշմանդամության խնդիրներ ունեցող անձանց եւ նրանց ընտանիքներին: Հարցերին, որոնց տեղում հնարավոր չէր լիարժեք պատասխան տալ, ՀՀ աշխատանքի եւ սոցիալական հարցերի նախարարը խոստացավ գրավոր պատասխանել մոտակա օրերին' հնարավորինս սեղմ ժամկետում: