Ախուրյանում առաջիկա օրերին կմեկնարկեն բնակարանաշինության աշխատանքները

ԳՅՈՒՄՐԻ, 25 ՄԱՅԻՍԻ, ԱՐՄԵՆՊՐԵՍ: Առաջիկա օրերին Ախուրյանում կմեկնարկեն բնակարանաշինության ծրագրի շինարարական աշխատանքները: Նշենք, որ արդեն ավարտվել են նախապատրաստական աշխատանքները. Ջրաշինարարների փողոցին հարակից' 1.5 հա հատկացված տարածքը մաքրվել է,կատարվել է հարթեցում եւ ցանկապատում:

Ինչպես «Արմենպրես»-ի Շիրակի մարզի թղթակցի հետ զրույցում նշեց համայնքի ղեկավար Արծրունի Իգիթյանը, կառուցվող շենքերի թիվը դեռ որոշված չէ: Այս աշխատանքերին զուգահեռ, ընթացքի մեջ են նաեւ անօթեւանների հերթացուցակի ճշգրտման աշխատանքները: Նախնական տվյալների համաձայն' համայնքում կա 182 անօթեւան: Այս թվի վերջնական ճշգրտումից պարզ կդառնա կառուցվող շենքերի եւ բնակարանների վերջնական թիվը:

Շինարարությունն իրականացվում է «Գլենդել հիլզ» կազմակերպության կողմից: Բազմաբնակելիներն արտաքնապես նման կլինեն Գյումրիի «Մուշ 2» թաղամասում կառուցված շենքերին: Հաշվի առնելով տարածքի գրունտային ջրերի մակարդակը' կկատարվեն շենքերի սեյսմիկ անվտանգության լրացուցիչ միջոցառումներ: