1 րոպեի ընթերցում
ԳՅՈՒՄՐԻ, 21 ՄԱՅԻՍ, ԱՐՄԵՆՊՐԵՍ: Գյումրիի քաղաքապետարանի նախաձեռնությամբ դեպի նորակառույց «Մուշ 2» թաղամաս տանող 2 հա տարածքի վրա այսօր հիմնվեց հայ-ռուսական բարեկամությունը խորհրդանշող այգի, որտեղ կատարվեց ծառատունկ: Այգու բացմանն ու ծառատունկին մասնակցեցին քաղաքապետարանի, Գյումրիում տեղակայված ՌԴ հյուպատոսարանի ներկայացուցիչները, զինվորականներ: Այգում տնկվեց մոտ 1500 արծաթափայլ բարդի եւ եղեւնի, սոսի եւ թխկի:
Ինչպես «Արմենպրես»-ի Գյումրիի թղթակցին տեղեկացրեց քաղաքապետարանի լրատվության հետ կապերի պատասխանատու Լիլիթ Աղեկյանը, տարածքի հարթեցման եւ մաքրման աշխատանքները մեկնարկել էին դեռ մեկ ամիս առաջ:
«Տարածքի առաջնային խնամքը կկատարվի քաղաքապետարանի ջրցան մեքենաներով, մինչ նոր ջրագծի կառուցումը: Տարածքը նաեւ պարսպապատվելու է, տեղադրվելու են նստարաններ»,-նշեց Լ.Աղեկյանը:
Ավելացնենք, որ Գյումրիում կա նաեւ հայ-ֆրանսիական բարեկամությունը խորհրդանշող այգի: