1 րոպեի ընթերցում
ԳՅՈՒՄՐԻ, 16 ՄԱՅԻՍԻ, ԱՐՄԵՆՊՐԵՍ: Կարմիր խաչի միջազգային կոմիտեի (ԿԽՄԿ) հայաստանյան գրասենյակն իրականացնում է սոցիալական ծրագիր' տուբերկուլյոզով հիվանդ քաղաքացիների համար:
Ինչպես «Արմենպրես»-ի Գյումրիի թղթակցին տեղեկացրեց Կարմիր խաչի Շիրակի մարզի մասնաճյուղի նախագահ Լեռնիկ Խաչատրյանը, բացի դեղորայքային բուժումից, իրականացվում է նաեւ սննդի հատկացման ծրագիր' հաշվի առնելով այն հանգամանքը, որ տուբերկուլյոզը սոցիալական հիվանդություն է: Ամեն ամիս Շիրակի մարզային մասնաճյուղին տրամադրվում է սնունդ, որն էլ իր հերթին այն տրամադրում է պոլիկլինիկաներին, որտեղ էլ սնունդը բաժանվում է հիվանդներին: Դրանք հիմնականում Շիրակի մարզի տուբերկուլյոզով հիվանդ այն քաղաքացիներն են, ովքեր գտնվում են բուժման ընթացքում: Ստացիոնար բուժում ստանալուց հետո նրանք չորս ամիս ստանում են սնունդ:
«Այս հիվանդության բուժման ամենակարեւոր բաղադրիչներից մեկը սնունդն է: Այս դեպքում բուժումն ավելի արդյունավետ է: Սնունդը բաժանելիս' մենք հաշվի ենք առնում' արդյո՞ք հիվանդը անհրաժեշտ դեղորայքը պարբերաբար ընդունում է, թե՞ ոչ: Տուբերկուլյոզը երկարատեւ բուժում է պահանջում»,-նշեց Լ. Խաչատրյանը:
Նշենք, որ յուրաքանչյուր ամիս այս ծրագրից օգտվում է 66 հիվանդ: