368.54
Իսպանիայի նորանշանակ դեսպանը Է. Նալբանդյանին է հանձնել իր հավատարմագրերի պատճենը
2 րոպեի ընթերցում
ԵՐԵՎԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ արտգործնախարար Էդվարդ Նալբանդյանն այսօր ընդունել է Հայաստանում Իսպանիայի նորանշանակ դեսպան (նստավայրը` Մոսկվա) Խուան Անտոնիո Մարկ Պուժոլին` հավատարմագրերի պատճենի հանձնման կապակցությամբ: Ինչպես «Արմենպրեսե-ին տեղեկացրին ՀՀ ԱԳՆ մամուլի եւ տեղեկատվության վարչությունից, ողջունելով հյուրին` Է. Նալբանդյանը հաջողություն է մաղթել նրան դիվանագիտական առաքելության կատարման գործում` հույս հայտնելով, որ դեսպանը պաշտոնավարման ընթացքում իր կարեւոր ներդրումը կունենա տարբեր ոլորտներում երկկողմ փոխգործակցության ընդլայնման եւ խորացման գործում: Իր հերթին դեսպան Պուժոլին նշել է, որ կանի առավելագույնը առկա համագործակցությունն ամրապնդելու եւ զարգացնելու ուղղությամբ: Զրույցի ընթացքում կարեւորվել է երկու երկրների միջեւ քաղաքական երկխոսության ակտիվացումը, առեւտրատնտեսական հարաբերությունների զարգացումը, մշակույթի, կրթության եւ զբոսաշրջության ոլորտներում համագործակցության ընդլայնումը, իրավապայմանագրային դաշտի ձեւավորումը: Հանդիպմանը ՀՀ ԱԳ նախարարը եւ դեսպան Պուժոլին անդրադարձել են նաեւ Հայաստան - Եվրոպական միություն հարաբերություններին եւ այդ շրջանակներում երկկողմ համագործակցության հնարավորություններին: Զրուցակիցները քննարկել են նաեւ տարածաշրջանային եւ միջազգային հարցեր:
Բաժանորդագրվեք մեր ալիքին Telegram-ում