Հանրապետությունում հունվար-հոկտեմբերին հայտնաբերվել է փայտանյութի ապօրինի տեղափոխման 49 դեպք

ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ (Հասմիկ Գեւորգյան): Հանրապետության անտառային պետýոնդից փայտանյութի ապօրինի տեղափոխման եւ իրացման նկատմամբ վերահսկողությունն ուժեղացնելու նպատակով ՀՀ բնապահպանության նախարարության պետական տեսչության (ԲՊՏ) եւ ոստիկանության մարզային վարչությունների աշխատակիցները հոկտեմբերի կեսերից համատեղ ստուգումներ են անցկացնում ավտոճանապարհների եւ խաչմերուկների վրա: Ինչպես «Արմենպրեսե-ին ասացին տեսչության գրասենյակում, շուրջօրյա հերթապահություն է սահմանվել Դիլիջան-Իջեւան, Երեւան- Վանաձոր, Երեւան-Սեւան, Երեւան-Կոտայք, Երեւան-Աշտարակ, Երեւան-Գորիս, Երեւան-Արարատ, Երեւան- Էջմիածին , Աշտարակ-Էջմիածին, Դեղձավան-Բագրատաշեն, Երեւան-Սիսիան մայրուղիների վրա տեղակայված ժամանակավոր եւ կայուն պետավտոտեսչության պահակակետերում: Ստուգումներ են անցկացվում նաեւ պահակակետերի հսկողությունից դուրս անտառտնտեսություններում (հատկապես` Լոռվա, Տավուշի), անտառամերձ բնակավայրերում, հանրապետության քաղաքներում եւ փայտանյութի սպառման կետերում: Հարեւան պետությունների քաղաքացիների կողմից անտառահատման դեպքերը բացառելու նպատակով նշված միջոցառումներն առաջիկայում կիրականացվեն նաեւ հանրապետության սահմանամերձ անտառատարածքներում, որի մասին նախապես իրազեկ կպահվի ՀՀ սահմանապահ զորքերի հրամանատարությանը: Նշենք, որ անցած տասը ամիսների ընթացքում բնապահպանները հայտնաբերել են ապօրինի փայտանյութի տեղափոխման 49 դեպք, որի համար հաշվարկվել եւ պետբյուջե է մուծվել 2450 հազար դրամ: Առգրավվել է նաեւ 15,4 խմ փայտանյութ (2006-ի նույն ժամանակահատվածում` 52,8 խմ), որը հետագա վաճառքի նպատակով հանձնվել է ճանապարհամերձ անտառտնտեսություններին: