Միացյալ Նահանգներ

Չինաստանում մեկնարկել է Սի-Պուտին-Թրամփ եռակողմ գագաթնաժողովը

3 րոպեի ընթերցում

Չինաստանում մեկնարկել է Սի-Պուտին-Թրամփ եռակողմ գագաթնաժողովը

Չինաստանի, Ռուսաստանի և Միացյալ Նահանգների նախագահներ Սի Ծինփինը, Վլադիմիր Պուտինը և Դոնալդ Թրամփը մեկնարկել են եռակողմ հանդիպումը, որը բնութագրվում է որպես «պատմական»: «Արմենպրես»-ի փոխանցմամբ՝ այս մասին հաղորդում է Reuters գործակալությունը:

Հանդիպման բացմանը Սի Ծինփինը մյուս երկու առաջնորդներին կոչ է արել երեք երկրների համատեղ ջանքերով դիմակայել գլոբալ մարտահրավերներին։

«Պատմությունը մեզ հուշում է, որ երբ խոշոր տերություններն ապրում են համերաշխության մեջ, աշխարհում խաղաղություն է տիրում, իսկ երբ խոշոր տերությունները բախվում են, աշխարհը հայտնվում է խառնաշփոթի մեջ», - հայտարարել է նա։

Չինաստանի ղեկավարը նշել է, որ խոշոր պետությունների միջև առողջ փոխգործակցությունը պարզապես ընտրության հարց չէ, այլ՝ անհրաժեշտություն։

«Չինաստանը, Ռուսաստանը և Միացյալ Նահանգները պետք է օրինակ ծառայեն մյուսներին, համագործակցեն գլոբալ մարտահրավերներին դիմակայելու գործում, համատեղ պաշտպանեն համաշխարհային խաղաղությունն ու կայունությունը և ավելի մեծ ներդրում ունենան մարդկության առաջընթացի գործում», - ասել է Սի Ծինփինը:

Թրամփն իր հերթին հայտարարել է, որ բանակցությունների ընթացքում երեք ղեկավարները կխոսեն «բոլոր խնդիրների մասին, որ քննարկվում են աշխարհում»:

«Մենք իսկապես պատմություն ենք կերտում։ Մենք երեքս քննարկելու շատ հարցեր ունենք», - ասել է նա։

Թրամփը նշել է, որ նախկինում առաջնորդները հաճախ խուսափել են երկխոսությունից այն երկրների ղեկավարների հետ, որոնց հետ տարաձայնություններ են ունեցել։

«Խաղաղություն երբեք չի հաստատվել՝ շփումների հնարավորությունները մերժելու պատճառով», - հավելել է ԱՄՆ նախագահը։

Թրամփը նաև նշել է, որ ԱՄՆ-ն, Չինաստանն ու Ռուսաստանը «յուրահատուկ դիրքում են»՝ միջուկային զենքի հետ կապված հարցերը քննարկելու համար։

Պուտինն իր հերթին շնորհակալություն է հայտնել Չինաստանին բանակցությունների կազմակերպման համար՝ շեշտելով, որ նման ձևաչափով հանդիպում առաջին անգամ է տեղի ունենում: Նա հայտարարել է, որ Ռուսաստանը, Չինաստանը և ԱՄՆ-ն կարող են ամրապնդել համաշխարհային կայունությունը, եթե կառուցողական կերպով համագործակցեն:

«Մեր երկրներն ունեն բազմաթիվ ընդհանուր շահեր՝ կապված տարածաշրջանային հակամարտությունների կարգավորման հետ, այդ թվում, բնականաբար, Ուկրաինայի հակամարտության», - ասել է նա։

Պուտինի խոսքով՝ ինքը, Սի Ծինփինն ու Դոնալդ Թրամփը կարող են «նշանակալի ներդրում ունենալ համաշխարհային անվտանգության և կայունության ամրապնդման գործում», եթե համագործակցեն կառուցողական և գործընկերային հիմունքներով:

Հանդիպման բաց հատվածը տևել է 10 րոպեից ավելի: Այնուհետև քննարկումները շարունակվել են փակ դռների հետևում:

AREMNPRESS

Հայաստան, Երևան, 0001, Աբովյան 9

+374 10 539818
[email protected]
fbtelegramyoutubexinstagramtiktokdzenspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2026 ARMENPRESS

Ստեղծվել է՝ MATEMAT-ում