Հակակոռուպցիոն կոմիտեի վարույթներով ինն ամսում արգելադրվել է շուրջ 24,3 միլիարդ դրամի գույք

Հակակոռուպցիոն կոմիտեի վարույթներով 2026 թվականի առաջին ինն ամիսներին արգելադրվել է շուրջ 24 միլիարդ 300 միլիոն դրամի շարժական և անշարժ գույք։ Ընթացիկ և ավարտված վարույթներով դրամական տեսքով փաստացի վերականգնվել է շուրջ 327 միլիոն դրամ, իսկ համայնքներին վերադարձվել է ապօրինի օտարված 19 հողատարածք՝ շուրջ 873 միլիոն դրամ ընդհանուր արժողությամբ։

«Արմենպրես»-ի հաղորդմամբ՝ այս մասին նոյեմբերի 9-ին հայտնել է Հակակոռուպցիոն կոմիտեի նախագահ Արթուր Նահապետյանը՝ կառույցի կազմավորման հինգերորդ տարեդարձին և աշխատակցի մասնագիտական տոնին նվիրված հանդիսավոր նիստում։ Նիստին մասնակցել է վարչապետ Նիկոլ Փաշինյանը։

Նահապետյանը հինգ տարին բնութագրել է որպես կոմիտեի կայացման կարևոր շրջան, որի ընթացքում կառույցը ձևավորել է մասնագիտական ներուժ, կուտակել փորձ և ամրապնդել կոռուպցիոն հանցագործություններին արձագանքելու ու նոր ռիսկեր բացահայտելու կարողությունները։ Նրա գնահատմամբ՝ կոմիտեի ստեղծմամբ կառավարությունն ինստիտուցիոնալ հիմք է տվել կոռուպցիայի դեմ պայքարին, իսկ կառույցի պարտականությունն այդ հանձնառությունն ամենօրյա աշխատանքով հանրության համար տեսանելի արդյունքների վերածելն է։ 

«Կոռուպցիայի դեմ պայքարի նշանակությունը, սակայն, չի սահմանափակվում բացահայտված դեպքերի կամ քննված վարույթների թվով։ Դրա վերջնական նպատակը այնպիսի պետություն ունենալն է, որտեղ բոլորը հավասար են օրենքի առաջ, իսկ քաղաքացին վստահ է, որ արդարությունը վեր է պաշտոնից, անձնական կապերից ու ազդեցությունից»,- ասել է Նահապետյանը։ 

Նա ընդգծել է, որ ոլորտի նկատմամբ պետական ուշադրությունը կոմիտեին պարտավորեցնում է ապահովել անաչառ քննություն, ինքնուրույն որոշումներ և համոզիչ արդյունքներ։ Գործունեության հինգ տարիների ընթացքում կոմիտեն քննել է 7 524 քրեական վարույթ։ Դրանցից 1 050-ը՝ 2 481 անձի վերաբերյալ, մեղադրական եզրակացությամբ ուղարկվել է դատարան։ Նույն ժամանակահատվածում ընթացք է տրվել 23 173 դիմում-հաղորդման։ Նահապետյանն այս արդյունքները կապել է քննիչների, օպերատիվ աշխատակիցների և մյուս ծառայողների աշխատանքի հետ՝ ընդգծելով, որ նրանք հաճախ աշխատել են բարդ պայմաններում և մեծ ծանրաբեռնվածությամբ։ 

2026 թվականի առաջին ինն ամիսներին կոմիտեի քննիչները նախաքննություն են իրականացրել 2 472 քրեական վարույթով՝ նախորդ տարվա նույն ժամանակահատվածի 2 061-ի դիմաց։ Մեղադրական եզրակացությամբ դատարան է ուղարկվել 286 վարույթ՝ 799 անձի վերաբերյալ։ Նախորդ տարվա նույն ժամանակահատվածում դատարան էր ուղարկվել 170 վարույթ՝ 431 անձի վերաբերյալ։ Դատարան ուղարկված վարույթների թիվն ավելացել է 116-ով, իսկ դրանցով մեղադրյալների թիվը՝ շուրջ 85 տոկոսով։ Նահապետյանն անդրադարձել է նաև երկարատև քննվող վարույթներին։ Ինն ամսում ընթացքը լուծված վարույթներից 79-ը քննվել է ավելի քան երկու տարի, իսկ 87-ը՝ մեկ տարի ժամկետում։ Դրանց թվում են հանրային հնչեղություն ստացած, նախկին և ներկա բարձրաստիճան պաշտոնյաներին կամ նրանց հետ փոխկապակցված անձանց վերաբերող վարույթներ։ Կոմիտեի նախագահը կարևորել է, որ յուրաքանչյուր վարույթ պատշաճ քննության արդյունքում հիմնավորված իրավական լուծում ստանա ողջամիտ ժամկետում։ 

Անդրադառնալով 2008 թվականի մարտի 1-ի և 2-ի իրադարձությունների վերաբերյալ վարույթին՝ Նահապետյանը խաղաղ ցուցարարների նկատմամբ գործադրված բռնության հանգամանքների բացահայտումը, խախտված իրավունքների վերականգնմանն ուղղված աշխատանքը և տեղի ունեցածին իրավական գնահատական տալը համարել է պետական պատասխանատվության հարց։ Նրա խոսքով՝ Մարդու իրավունքների եվրոպական դատարանի՝ 2025 թվականի սեպտեմբերի 18-ի վճռից հետո ձևավորվել է քննչական խումբ, իրականացվել են ապացուցողական և այլ վարութային գործողություններ։ Ձեռք բերված ապացույցների հիման վրա մեղադրանքներ են ներկայացվել նաև մի շարք նախկին բարձրաստիճան պաշտոնատար անձանց։ 

«Հաշվետու ժամանակահատվածում հիմնական վարույթից անջատվել և մեղադրական եզրակացությամբ դատարան է ուղարկվել հինգ քրեական վարույթ՝ 10 անձի վերաբերյալ։ Եվս 11 մեղադրյալի մասով նախաքննությունը շարունակվում է։ Կոմիտեն հետևողականորեն շարունակելու է աշխատանքը՝ ապահովելու ամբողջական, անաչառ քննություն և բոլոր հանգամանքների պատշաճ իրավական գնահատական»,- ասել է Նահապետյանը։  

Հունիսի 7-ին կայացած Ազգային ժողովի ընտրությունների առնչությամբ կոմիտեում նախաձեռնվել է 243 քրեական վարույթ, հանրային քրեական հետապնդում է հարուցվել 321 անձի նկատմամբ։ Կոմիտեն 276 անձի վերաբերյալ վարույթները մեղադրական եզրակացությամբ ուղարկել է դատարան։ Նահապետյանի խոսքով՝ բացահայտված դեպքերի շուրջ 70 տոկոսի առնչությամբ վարույթները նախաձեռնվել են կոմիտեի ծառայողների հաղորդումների հիման վրա։ 

Ընտրական գործերի քննության ընթացքում կոմիտեն վեր է հանել օրենսդրական բացեր և ընտրական հանցագործություններին նպաստող այլ հանգամանքներ։ Դրանք վերացնելու առաջարկներ են ներկայացվել իրավասու մարմիններին։ Կոմիտեն նաև իրազեկման աշխատանք է իրականացրել տեսանյութերի, մամուլի և SMS հաղորդագրությունների միջոցով։ 

«Մասնավորապես՝ արձանագրվել է Կոմիտեի հետ քաղաքացիների հաղորդակցման և համագործակցության ակտիվացում, ավելացել են թեժ գծի ծառայություն ստացվող զանգերը, օպերատիվ ստորաբաժանումներին տրամադրվող տեղեկություններն ու դրանց հետ համագործակցելու պատրաստակամությունը։ Ավելին՝ քրեական վարույթների շրջանակներում ձեռք են բերվել ցուցմունքներ, որոնց համաձայն՝ իրազեկման տեսանյութերին ծանոթանալուց հետո առանձին անձինք հրաժարվել են ընտրական կոռուպցիոն բնույթի՝ նախկինում ձեռք բերված պայմանավորվածություններից»,- նշել է Նահապետյանը։ 

Հաշվետու ժամանակահատվածում օպերատիվ-հետախուզական ստորաբաժանումները ներկայացրել են կոռուպցիոն բնույթի հանցագործությունների վերաբերյալ 198 հաղորդում՝ նախորդ տարվա նույն ժամանակահատվածի 67-ի դիմաց։ Բացահայտված դեպքերի թվում, ըստ Նահապետյանի, եղել են բարդ, բազմադրվագ և հանրային հնչեղություն ստացած գործեր։ Նախաքննական և օպերատիվ-հետախուզական ստորաբաժանումներում ներդրվել են աշխատանքի գնահատման չափանիշներ, որոնք պետք է նվազեցնեն սուբյեկտիվ մոտեցումները և հիմք ծառայեն առաջխաղացման, խրախուսման ու մասնագիտական զարգացման վերաբերյալ որոշումների համար։ Կոմիտեն նաև աշխատանքներ է տարել տվյալների վերլուծության և կոռուպցիոն հանցագործությունների բացահայտման համար արհեստական բանականության գործիքներ կիրառող ծրագրեր ձեռք բերելու և առօրյա աշխատանքում ներդնելու ուղղությամբ։

 Նահապետյանը հայտնել է, որ կառավարության աջակցությամբ շարունակվել են աշխատանքային պայմանների բարելավումն ու նյութատեխնիկական բազայի ամրապնդումը։ Գործնական ընթացք է ստանում նաև կոմիտեի միասնական վարչական համալիրի կառուցման նախաձեռնությունը։ 

Նա շնորհակալություն է հայտնել կառավարությանը աշխատանքային ու սոցիալական պայմանների բարելավմանն աջակցելու համար և կարևորել իրավապահ մարմինների միջև տեղեկատվության փոխանակումն ու մասնագիտական փոխօգնությունը։ 

«Առաջիկայում մեր առաջնահերթություններն են լինելու տևական ժամանակ քննվող վարույթների պատշաճ քննությունն ու դատավարական ավարտը, պատճառված վնասի վերականգնումը, ինչպես նաև ապօրինի ծագում ունեցող գույքի և ֆինանսական միջոցների հայտնաբերմանն ու վերադարձմանն ուղղված աշխատանքի ակտիվացումը»,- ասել է Նահապետյանը։ 

Կոմիտեի նախագահը նշել է, որ կառույցն իր աշխատանքը շարունակելու է՝ այն համադրելով կառավարության առաջնահերթությունների և երկրի զարգացման ռազմավարական նպատակների հետ։ Որպես աշխատանքի չափանիշներ նա առանձնացրել է յուրաքանչյուր որոշման իրավաչափությունը, քննության որակը և հանրային շահի պաշտպանությունը։ 

Ելույթի ավարտին Նահապետյանը շնորհակալություն է հայտնել աշխատակիցներին՝ ընդգծելով, որ կառույցի հեղինակությունը կախված է նրանց մասնագիտական գիտելիքներից, պատասխանատվությունից և ամենօրյա որոշումներից։