Ուկրաինան պետք է ձգտի նրան, որ ԱՄՆ-ն ապասառեցնի 16 միլիարդ դոլարի օգնությունը. Զելենսկի
2 րոպեի ընթերցում
ԱՄՆ Կոնգրեսի ընտրություններում դեմոկրատների հաղթանակից հետո Միացյալ Նահանգները կարող է սկսել ավելի շատ օգնություն տրամադրել Ուկրաինային։ «Արմենպրես»-ի փոխանցմամբ՝ այս մասին ուկրաինական TSN հեռուստաալիքին տված հարցազրույցում հայտարարել է երկրի նախագահ Վոլոդիմիր Զելենսկին։
«Ուկրաինան պետք է շարժվի դեպի Միացյալ Նահանգների նոր քաղաքական ենթակառուցվածքներ։ Մենք պետք է արագ շարժվենք։ Մենք պետք է ամրապնդենք մեր երկկուսակցական աջակցությունը։ Հասկանալով իշխանության վերաբաշխումը՝ մենք պետք է ճիշտ կառուցենք երկխոսությունը։ Այժմ Միացյալ Նահանգներից լրացուցիչ օգնություն ստանալու մեր հնարավորությունները կարող են աճել», - նշել է Զելենսկին։
Նա նաև շեշտել է, որ Ուկրաինան պետք է համագործակցի ԱՄՆ Կոնգրեսի, նախագահի, Պաշտպանության նախարարության հետ։
«Եվ նայեք, եթե մենք չլուծենք Patriot-ի հարցը, մեզ համար շատ դժվար կլինի», - հավելել է նա։
Մասնավորապես Զելենսկին նշել է, որ Ուկրաինան պետք է ձգտի ստանալ խոստացված 16 միլիարդ դոլարի ամերիկյան օգնությունը։
«Եվ այդ պատճառով մենք պետք է աշխատենք Ամերիկայի Միացյալ Նահանգների կողմից տրամադրվող օգնության փաթեթի վրա։ Մենք պետք է անդրադառնանք այն հարցին, որ նախորդ համաձայնագրերում և որոշումներում 16 միլիարդ դոլարը պահվել է և չի տրամադրվել Ուկրաինային: Մենք շնորհակալ ենք տրամադրված ամեն ինչի համար, բայց Ուկրաինան պետք է առնվազն պայքարի այս գումարի համար», - շեշտել է նա։
ԱՄՆ նախագահ Դոնալդ Թրամփի հանրապետական վարչակազմը դադարեցրել է Ուկրաինային ֆինանսական և ռազմական օգնության տրամադրումը, բայց շարունակում է հետախուզական տվյալներ տրամադրել Ուկրաինայի զինված ուժերին և զենք վաճառել եվրոպական երկրներին, որոնք այն փոխանցում են Կիևին: