Սպիտակ տունը հերքել է Հեգսեթի և Ռուբիոյի պաշտոնանկության մասին լուրերը

Սպիտակ տունը հերքել է այն լուրերը, թե ԱՄՆ պատերազմի նախարար Փիթ Հեգսեթը և պետքարտուղար Մարկո Ռուբիոն կարող են լքել իրենց պաշտոնները՝ նախագահ Դոնալդ Թրամփի վարչակազմում հետընտրական կադրային փոփոխությունների շրջանակում։ «Արմենպրես»-ի փոխանցմամբ՝ այս մասին հաղորդում է BBC-ն։

Ամերիկյան լրատվամիջոցները հայտնում են, որ Հեգսեթին պաշտոնից հեռացնելու կոչեր են հնչել։ Մասնավորապես, քննադատության է ենթարկվում Իրանի դեմ պատերազմը վարելու եղանակը։ Հենց Իրանի դեմ պատերազմն է, ըստ փոխնախագահ Ջեյ Դի Վենսի և նաև նախագահ Թրամփի, պատճառ դարձել, որ Հանրապետական կուսակցությունը կորցնի վերահսկողությունը Կոնգրեսի երկու պալատների նկատմամբ՝ նոյեմբերի 3-ի ընտրություններում պարտվելով դեմոկրատներին։

Կոնգրեսից հեռացող հանրապետական պատգամավորներից մեկը սպառնացել է արդեն հաջորդ շաբաթ նախաձեռնել Հեգսեթի իմփիչմենթի քվեարկությունը։ Ի պատասխան՝ Հեգսեթը տեսաուղերձ է հրապարակել՝ պաշտպանելով իր գործունեությունը։

«Տեսեք, նրանք հարձակվում են ինձ վրա։ Հարձակվում են մեզ վրա, որովհետև մենք արդյունավետ ենք գործում։ Դա չի ստացվելու։ Մենք չենք նահանջելու», - հայտարարել է նա։

Ռուբիոն իր հերթին հերքել է լուրերը, թե պատրաստվում է հեռանալ պաշտոնից 2028 թվականի նախագահական ընտրություններին իր թեկնածությունն առաջադրելու համար։ The New York Times-ին տված հարցազրույցում նա նշել է, որ Թրամփի մոտ աշխատելը մինչև նրա պաշտոնավարման ավարտը «միշտ եղել է իմ ծրագիրը»։

Ըստ հրապարակման՝ Սպիտակ տունը և ԱՄՆ պետքարտուղարությունը նույնպես հերքել են այն տեղեկությունները, թե Մարկո Ռուբիոն կարող է հեռանալ իր պաշտոնից՝ Կոնգրեսի միջանկյալ ընտրություններում հանրապետականների կրած պարտությունից հետո։ Երկու կառույցներն էլ այդ տեղեկություններն անվանել են «կեղծ լուրեր»։

Թրամփն իր հերթին ABC News-ի հետ զրույցում հայտնել է, որ Հեգսեթի վերաբերյալ «կոչեր է ստացել», սակայն նա հավելել է, որ մտադիր է նրան պահել պաշտոնում։ Ավելի ուշ՝ նոյեմբերի 5-ին, Սպիտակ տանը լրագրողների հետ զրույցում Թրամփը հայտարարել է, որ «Փիթ Հեգսեթը հիանալի աշխատանք է կատարել»։ Այնուհետև նա թվարկել է Հեգսեթի ձեռքբերումները, որոնց թվում նշել է հունվարին Վենեսուելայի նախագահ Նիկոլաս Մադուրոյի ձերբակալությունը և Իրանի դեմ պատերազմը։

The Washington Post-ը նոյեմբերի 5-ին հաղորդել է, որ, այնուամենայնիվ, Թրամփը կարող է քննարկել Զինված ուժերի շտաբների պետերի միացյալ կոմիտեի նախագահ, գեներալ Դեն Քեյնի կամ ԱՄՆ Կենտրոնական հրամանատարության ղեկավար, ծովակալ Բրեդ Քուփերի պաշտոնանկության հարցը։ Նրանք երկուսն էլ, ըստ ԶԼՄ-ների, նշանակալի դեր են ունեցել Իրանի դեմ ութ ամիս առաջ սկսված պատերազմի վերաբերյալ խորհրդատվություն տրամադրելու գործում։