ՆԳ նախարարը ՀՀ քաղաքացիություն ստանալու դիմումների քննության ուշացումները բացատրել է դիմելիության աճով
2 րոպեի ընթերցում
Հայաստանի քաղաքացիություն ստանալու դիմումների թվի աճի պատճառով համապատասխան ստուգումները որոշ դեպքերում չեն ավարտվել օրենսդրությամբ նախատեսված ժամկետում։
«Արմենպրես»-ի հաղորդմամբ՝ այս մասին նոյեմբերի 4-ին լրագրողների հետ ճեպազրույցում ասել է ներքին գործերի նախարար Արփինե Սարգսյանը՝ պատասխանելով դիմումների ընթացքի ձգձգումների վերաբերյալ հարցին։
Նրա խոսքով՝ կուտակված դիմումների քննությունն արագացնելու համար քաղաքացիության ոլորտի ծառայողները տարբեր փուլերում աշխատել են նաև շաբաթ և կիրակի օրերին։
Նախարարը նշել է, որ 2027 թվականի հունվարի 1-ից քաղաքացիության դիմումների ընդունման թվային հարթակի գործարկումն ավելի հասանելի է դարձրել ծառայությունը, ինչն իր հերթին էականորեն ավելացրել է դիմումների թիվը։
«Մենք սկսեցինք էական մեծ թվով դիմումներ ստանալ, և սա է պատճառը, որ օրենսդրությամբ նախատեսված ժամկետում շատ հաճախ չէինք հասցնում տեղավորվել և բոլոր ստուգումներն ավարտել։ Տարբեր փուլերում շաբաթ-կիրակին աշխատանքային եմ հայտարարել քաղաքացիության բլոկի ծառայողների համար, որպեսզի մեր ունեցած ծանրաբեռնվածությունը թոթափենք»,- ասել է Սարգսյանը։
Նրա խոսքով՝ ստուգումները բոլոր դիմողների համար իրականացվում են նույն ընթացակարգով, և բացառություններ չեն կարող սահմանվել։
«Ժամկետները ստուգման համար են նախատեսված, և մենք պիտի հասկանանք, թե ում ենք տալիս Հայաստանի Հանրապետության քաղաքացիություն։ Մեր գործընթացը ստանդարտ է, բոլորին է վերաբերում, բոլոր անձանց, և մենք չենք կարող բացառություններ անել»,- ընդգծել է նախարարը։
Սարգսյանը հույս է հայտնել, որ մինչև տարեվերջ իրավիճակը կբարելավվի։