1 րոպեի ընթերցում
Սիրիայի տարբեր շրջաններում, մասնավորապես հյուսիսային և արևելյան հատվածներում ուժգին անձրևներ են տեղացել, որոնք հանգեցրել են հեղեղումների և բազմաթիվ ճանապարհների փակման։ «Արմենպրես»-ի փոխանցմամբ՝ այս մասին հաղորդում է սիրիական SANA գործակալությունը։
Սիրիայի արտակարգ իրավիճակների և աղետների կառավարման նախարարությունը հոկտեմբերի 30-ին հայտարարել է Ռակկայի, Դեր Զորի և Հալեպի շրջաններում հինգ մարդու, այդ թվում՝ չորս երեխայի մահվան մասին։ Տեղեկություններ են հաղորդվել, որ տեղատարափ անձրևների պատճառով ևս հինգ մարդ անհետ կորել է։
Սիրիայի պաշտպանության նախարարությունը նոյեմբերի 2-ին հայտարարել է Ռակկայի շրջանի Տաբկա քաղաքում ջրհեղեղի հետևանքով անհետ կորած երկու անձանցից մեկի մարմնի հայտնաբերման մասին։ Ըստ տեղեկությունների՝ շարունակվում են որոնողական աշխատանքները մյուս անհետ կորած անձին գտնելու ուղղությամբ։
Ջրհեղեղները Ռակկայի նահանգում կամրջի փլուզման պատճառ են դարձել՝ փակելով հարևան Հալեպի նահանգի հետ կապող ճանապարհը։
Քուվեյթը և Բահրեյնն իրենց համերաշխությունն ու կարեկցանքն են հայտնել Սիրիային ջրհեղեղների և զոհերի կապակցությամբ։