Եմենի կառավարական ուժերը հայտնել են հութիներից դիրքեր հետ գրավելու մասին

Եմենի միջազգայնորեն ճանաչված կառավարությունը հայտնել է, որ իր ուժերը երկրի հարավ-արևմուտքում գտնվող Լահջի նահանգում հութիներից դիրքեր են հետ գրավել։ «Արմենպրես»-ի փոխանցմամբ՝ այս մասին  հաղորդում է Al Jazeera-ն։

«Մեր զինված ուժերին հաջողվել է հետ գրավել դիրքեր Լահջի նահանգի հյուսիսում՝ ալ-Նուսայրահ ճակատի ալ-Խազզան ալ-Ահմար հատվածում, ինչպես նաև հետ մղել հութի ահաբեկչական խմբավորումներին», - նշված է կառավարական ուժերի հաղորդագրության մեջ։

Նաև տեղեկություններ են հաղորդվել, որ կառավարական ուժերը մարտեր են մղում հութիների դեմ ալ-Մաքաթիրա ճակատի Մուայքի և Անանի հատվածներում։

Եմենի կառավարությունը ՄԱԿ-ի Անվտանգության խորհրդին հորդորել է ավելի լուրջ գործողություններ ձեռնարկել Իրանի կողմից հութիներին զենքի փոխանցումը կասեցնելու համար:

Կոչը հնչեցրել է ՄԱԿ-ում Եմենի բանագնաց Աբդալլահ աս-Սաադին ՄԱԿ-ի գլխավոր քարտուղարին և Անվտանգության խորհրդին ներկայացված զեկույցի ժամանակ։

Հութիների խոսնակ Յահյա Սարին X հարթակում գրառման մեջ հայտնել է, որ վերջին 24 ժամվա ընթացքում Սաուդյան Արաբիայի Խամիս Մուշաիտ և Տաիֆ ավիաբազաներից F-15 և Typhoon ռազմական ինքնաթիռները 109 ավիահարված են հասցրել Սաադայի, Թաիզի, Լահջի, ալ-Ջաուֆի և Հոդեյդայի նահանգներում գտնվող բնակավայրերին, որի հետևանքով քաղաքացիական բնակչության շրջանում կան զոհեր և վիրավորներ։