1 րոպեի ընթերցում
Հայաստանի սպորտային մարմնամարզության հավաքականի անդամ, աշխարհի նորընծա չեմպիոն Համլետ Մանուկյանը Նիդեռլանդների Ռոտերդամ քաղաքում կայացած մարմնամարզության ԱԱ-ի ոսկե մեդալն իր նպատակներից մեկն է համարում:
«Այս մեդալն ինձ համար շատ սպասված էր: Այն իմ նպատակներից ու երազանքներից միայն մեկն է։ Փառք եմ տալիս Աստծուն, որ այդ օրը կարողացա վարժությունս կատարել այնպես, որ դարձա նժույգ-թափերի մեդալակիր։ Կրկնակի ուրախ եմ, որ պատվո հարթակը կիսում էի ընկերոջս՝ Մամիկոնի հետ, քանի որ այլ է ուրախությունը, երբ միասին մարզվում ենք, միասին տանջվում և միասին կանգնում պատվո հարթակին։ Ինձ համար մեծ պատիվ է Մամիկոնի հետ նույն պատվո հարթակին լինելը»,-«Արմենպրես»-ի հաղորդմամբ՝ լրագրողների հետ զրույցում ասել է Մանուկյանը։
Մանուկյանի խոսքով՝ աշխարհի առաջնությունից առաջ Հայաստանի հավաքականը նախապատրաստական հաջող փուլ է անցկացրել։
Նիդեռլանդների Ռոտերդամ քաղաքում կայացած սպորտային մարմնամարզության աշխարհի առաջնությունում Հայաստանի հավաքականից աշխարհի չեմպիոն դարձան Արթուր Դավթյանը (հենացատկ), Համլետ Մանուկյանը (նժույգ-թափեր), իսկ Արթուր Ավետիսյանը (օղակներ) ու Մամիկոն Խաչատրյանը (նժույգ-թափեր) նվաճեցին բրոնզե մեդալներ: