Նիդեռլանդները ֆինանսական աջակցություն կտրամադրի Հայաստանին՝ անհետ կորած անձանց որոնման գործընթացում
2 րոպեի ընթերցում
Նիդեռլանդները ֆինանսական աջակցություն կտրամադրի Հայաստանին՝ Հայաստանի և Ադրբեջանի միջև հակամարտության հետևանքով անհետ կորած անձանց որոնման գործընթացում:
«Արմենպրես»-ի փոխանցմամբ՝ այս մասին Հայաստանի արտաքին գործերի և միջազգային առևտրի նախարար Արարատ Միրզոյանի հետ համատեղ մամուլի ասուլիսի ընթացքում հայտարարեց Նիդեռլանդների արտաքին գործերի նախարար Թոմ Բերենդսենը:
«Նիդեռլանդները ողջունում է այն զգալի քայլերը, որ Հայաստանն ու Ադրբեջանն անցյալ տարվանից ի վեր կատարել են խաղաղության գործընթացում: Ես ևս մեկ անգամ սատարում և աջակցում եմ այն քայլերին, որոնք Հայաստանն արել է այդ գործընթացն առաջ տանելու համար: Այս տարածաշրջանի խաղաղության հաստատման համար շատ կարևոր է, որ այս գործընթացը ներառված լինի և ամփոփվի խաղաղության համաձայնագրի ստորագրմամբ: Մենք մինչև վերջ աջակցում ենք ձեզ այս հարցում: Հայտարարում եմ նոր ֆինանսական աջակցության մասին՝ անհետ կորած անձանց որոնման գործընթացին աջակցելու նպատակով։ Սա շատ կարևոր նախագիծ է, այո, դա կապված է նաև Ադրբեջանի հետ, միայն Հայաստանին չի վերաբերում այս նախագիծը, այլ նաև Ադրբեջանին: Հույժ կարևոր է այստեղ, որ վստահության կամուրջներ կառուցվեն, որ սա խաղաղության ընթացքի մի մասը կազմի: Սա հույժ կարևոր ծրագիր է, որտեղ Նիդեռլանդները ցանկանում է ֆինանսական աջակցություն ցուցաբերել, նաև, եթե հնարավոր լինի, այլ եղանակներով ևս»,- ասաց Բերենդսենը:
Հայաստանի արտաքին գործերի և միջազգային առևտրի նախարար Արարատ Միրզոյանը հավելեց, որ անհետ կորած անձանց հարցը բավական զգայուն և կարևոր է, ինչպես Հայաստանի, այնպես էլ Ադրբեջանի համար և այստեղ ողջունելի է նաև երրորդ երկրների մասնակցությունը: