Մարտի 1-ի գործով ոստիկանության զորքերի նախկին հրամանատարի վերաբերյալ վարույթն ուղարկվել է դատարան
2 րոպեի ընթերցում
Մարտի 1-ի գործով մեղադրյալ՝ ՀՀ ոստիկանության զորքերի նախկին հրամանատար, ոստիկանության պետի նախկին տեղակալ Գ.Գ.-ի վերաբերյալ քրեական վարույթի նյութերը՝ հաստատված մեղադրական եզրակացությամբ, հանձնվել են դատարան։ «Արմենպրես»-ի փոխանցմամբ՝ այս մասին հաղորդագրություն է տարածել ՀՀ դատախազությունը։
Գ.Գ.-ի նկատմամբ հանրային քրեական հետապնդումը հարուցվել է 2026 թվականի սեպտեմբերի 4-ին՝ ծառայության նկատմամբ անփույթ վերաբերմունքի համար, որն անզգուշությամբ առաջացրել է ծանր հետևանքներ։ Նա ոստիկանության զորքերի հրամանատարի և ոստիկանության պետի տեղակալի պաշտոնը զբաղեցրել է 2003 թվականից մինչև 2008 թվականի հուլիսի 2-ը։
Ըստ դատախազության՝ Գ.Գ.-ն միջոցներ չի ձեռնարկել ենթակա ստորաբաժանումները կիրառման համար պիտանի և ոչ ժամկետանց հատուկ միջոցներով ապահովելու, դրանց անվտանգ ու ճիշտ շահագործումը կազմակերպելու ուղղությամբ։
Հաղորդագրության համաձայն՝ 2008 թվականի մարտի 1-ին Երևանի Պարոնյան, Սուրբ Գրիգոր Լուսավորիչ, Լեո փողոցների և Մաշտոցի պողոտայի հատման հատվածին հարակից տարածքներում տեղի ունեցած իրադարձությունների ընթացքում նա անմիջականորեն, ինչպես նաև ենթակա հրամանատարների միջոցով հրամայել է զինծառայողներին «ԿՍ-23» հատուկ կարաբիններից ցուցարարների ուղղությամբ արձակել փակ տարածքներում գործադրման համար նախատեսված «Չերյոմուխա-7» տեսակի արցունքաբեր գազի նռնակներ։
Դատախազության փոխանցմամբ՝ առանց նախազգուշացման կիրառվել են ժամկետանց, օգտագործման համար ոչ պիտանի և ոչնչացման ենթակա հատուկ միջոցներ։ Դրանց կիրառման հետևանքով ցույցի մասնակիցներից երեք անձ մահացել է, երկու անձի առողջությանը պատճառվել է ծանր, իսկ մեկ անձի առողջությանը՝ միջին ծանրության վնաս։
«Դատախազը 2026 թվականի հոկտեմբերի 7-ին, հաստատված մեղադրական եզրակացությամբ, Երևան քաղաքի առաջին ատյանի ընդհանուր իրավասության քրեական դատարան է հանձնել Գ.Գ.-ի վերաբերյալ քրեական վարույթի նյութերը»,– նշված է հաղորդագրության մեջ։