2 րոպեի ընթերցում
Եվրոպական հանձնաժողովը առաջարկում է մեխանիզմ, որը թույլ կտա կրճատել ԵՄ նոր անդամ պետությունների ֆինանսավորումը և սահմանափակել նրանց քվեարկության իրավունքն օրենքի գերակայության, ժողովրդավարության և հիմնարար իրավունքների նկատմամբ նրանց պարտավորություններից լուրջ նահանջի դեպքում։
Ինչպես հաղորդում է «Արմենպրես»-ը, վկայակոչելով «ՌԻԱ Նովոստի»-ին, այս մասին հոկտեմբերի 6-ին հայտարարել է Եվրահանձնաժողովի ընդլայնման հարցերով հանձնակատար Մարթա Կոսը։
«Մենք ցանկանում ենք ավելի հեշտացնել ֆինանսական աջակցության կրճատումը կամ քվեարկության իրավունքի սահմանափակումը։ Սա այսպես ասած ապահովագրական երաշխիք է, որպեսզի մենք կարողանանք արձագանքել անհրաժեշտության դեպքում», - նշել է Կոսը՝ ներկայացնելով Եվրահանձնաժողովի առաջարկները՝ ԵՄ-ն ապագա ընդլայնմանը նախապատրաստելու համար։
Նրա խոսքով՝ Եվրահանձնաժողովը առաջարկում է բոլոր նոր անդամ պետությունների համար ներդնել ուժեղացված երաշխիքներ «բանակցությունների ընթացքում ստանձնած պարտավորություններից լուրջ նահանջի դեպքում, մասնավորապես՝ իրավունքի գերակայության, ժողովրդավարության և հիմնարար իրավունքների ոլորտում»։
Կոսը մանրամասնել է, որ խոսքը նաև Եվրամիության մասին պայմանագրի 4-րդ հոդվածում ամրագրված բարեխիղճ համագործակցության սկզբունքի հնարավոր լուրջ խախտումների մասին է։