2 րոպեի ընթերցում
Լուկա Պիալլինի ընկերության «Տիեզերական ճամփորդություն» օդային ներկայացմամբ հոկտեմբերի 1-ին Երևանում մեկնարկել է «Հայ ֆեստ» կատարողական արվեստների 24-րդ միջազգային փառատոնը։ Իտալիայից ժամանած թատերախմբի ներկայացումը արվեստասերները դիտել են Կասկադ համալիրի Գաֆէսճեան քանդակների պարտեզում։
«Արմենպրես»-ի հաղորդմամբ՝ «Տիեզերական ճամփորդություն»-ն անդրադարձել է ժառանգության թեմային՝ ներկայացնելով այն աշխարհը, որը մարդը չի կարողացել փոխել և որը պատրաստվում է փոխանցել հաջորդ սերունդներին։
Ներկայացման ռեժիսոր Լուկա Պիալլինին իր ստեղծագործական ուղին սկսել է «Երրորդ թատրոնի» ընկերություններում՝ հետաքրքրվելով բարձրության հետ կապված արվեստով՝ ստիլտներով քայլելուց և ժայռամագլցումից մինչև ուղղահայաց պար։
Շրջագայելով աշխարհի տարբեր երկրներում, նա ստեղծել է սեփական ընկերությունը՝ համադրելով թատրոնը, պերֆորմանսն ու իր յուրահատուկ գեղարվեստական տեսլականը։
«Հայ ֆեստ» կատարողական արվեստների միջազգային փառատոնն ընդգրկված է «EFFA» եվրոպական փառատոնների ասոցիացիայի 24 լավագույնների ցանկում։
Փառատոնն իրականացվում է ՀՀ կրթության, գիտության, մշակույթի և սպորտի նախարարության, Երևանի քաղաքապետարանի աջակցությամբ։