Բուենոս Այրեսում ՀՀ անկախության 35-ամյակի տոնակատարությունը նշանավորել է երկու ժողովուրդների մշակութային ամուր կապերը
3 րոպեի ընթերցում
Բուենոս Այրեսի Ազատության պալատի Ազգային համերգասրահում սեպտեմբերի 21-ին ՀՀ դեսպանությունը կազմակերպել է հանդիսավոր համերգ՝ նվիրված Հայաստանի Հանրապետության անկախության 35-ամյակին։
Համերգը դարձել է Հայաստանի անկախության տոնի նշանավորումը Արգենտինայում՝ միավորելով հայ և արգենտինացի արվեստագետներին և ստեղծելով երկու երկրների երաժշտական ու մշակութային ժառանգության յուրահատուկ երկխոսություն։
Ինչպես «Արմենպրես»-ին տեղեկացրին դեսպանությունից, համերգը բացել է Aeropuertos Argentina նվագախումբը՝ Նեստոր Տեդեսկոյի ղեկավարությամբ։ Նվագախումբը կատարել է Արամ Խաչատրյանի «Դիմակահանդես» բալետից հատվածներ և «Սուսերով պարը»։
Հայտնի բանդոնեոնահար Վալտեր Ռիոսը կատարել է Սայաթ-Նովայի «Քանի վուր ջան իմ»-ը և Աստոր Պիացոլլայի «Adiós Nonino»-ն, իսկ Մարիել Դուպետիտը ներկայացրել է Շառլ Ազնավուրի «La bohème»-ն։
Սոպրանո Ալլա Ավետիսյանը կատարել է Արտեմի Այվազյանի «Երևան»-ը և Կոմիտասի «Կռունկ»-ը։ Դուդուկահար Հակոբ Բարսեղյանը, նվագախմբի ուղեկցությամբ, ներկայացրել է Աստոր Պիացոլլայի «Oblivion»-ը և Սայաթ-Նովայի ստեղծագործությունների պոպուրին։
Հայաստանի անկախության 35-ամյակին նվիրված այս համերգի համար հատուկ կազմավորված Բուենոս Այրեսի հայկական դպրոցների 35 սաների երգչախումբը, Արեգ Կնյազյանի ղեկավարությամբ, կատարել է «Էրեբունի-Երևան» երգը։
Համերգը շարունակել են Կոլոն թատրոնի բալետի մենակատարներ Մատիաս Սանտոսը և Նատալիա Պելայոն՝ ներկայացնելով Արամ Խաչատրյանի «Սպարտակ» բալետից մի հատված։
Երեկոն ամփոփվել է Արգենտինայի ժողովրդական պարերի պետական անսամբլի կատարումներով և բալետմեյստեր Կարեն Գևորգյանի բեմադրած «Հայկական զարդանախշեր» պարի առաջին բեմելով, որը հանդիսատեսի կողմից ընդունվել է հոտնկայս ծափահարություններով։
Հայ և արգենտինացի արվեստագետների համատեղ ելույթները խորհրդանշել են երկու ժողովուրդների միջև ձևավորված բարեկամությունն ու մշակութային կապերը։ Հայկական և արգենտինյան երաժշտության, պարի և արվեստի այս երկխոսությունը ևս մեկ անգամ ցույց է տվել, որ մշակույթը կարող է դառնալ ժողովուրդներին միմյանց կապող ամուր և կենդանի կամուրջ։