ՄԱԿ-ի Գլխավոր ասամբլեան հաստատել է Մոլորակի կանաչապատման միջազգային օրը

ՄԱԿ-ի Գլխավոր ասամբլեան Ղազախստանի նախաձեռնությամբ ընդունել է բանաձև, որն ապրիլի 22-ը հռչակում է Մոլորակի կանաչապատման միջազգային օր։ «Արմենպրես»-ի փոխանցմամբ՝ այս մասին հայտնել է Ղազախստանի արտաքին գործերի նախարարության մամուլի ծառայությունը։

Արտաքին քաղաքական գերատեսչության տվյալներով՝ «միջազգային օր սահմանելու նախաձեռնությունն առաջադրվել է Ղազախստանի Հանրապետության նախագահ Կասիմ-Ժոմարտ Տոկաևի կողմից 2025 թ. սեպտեմբերին ՄԱԿ-ի Գլխավոր ասամբլեայի 80-րդ նստաշրջանի ընդհանուր քննարկումների ընթացքում», իսկ փաստաթղթի համահեղինակ է դարձել 32 երկիր։

Ղազախստանի արտաքին գործերի նախարարությունը նշել է, որ բանաձևը կոչված է աջակցելու հասարակության իրազեկվածությանը շրջակա միջավայրի պահպանման կարևորության մասին։ Հանրապետությունում նախագահի նախաձեռնությամբ 2024 թվականից իրականացվում է «Մաքուր Ղազախստան» ակցիան, որի նպատակն է պատասխանատու վերաբերմունքի ձևավորումը բնության և շրջակա միջավայրի նկատմամբ: