Կենտրոնաֆրիկյան Հանրապետությունում ոսկու հանքահորերի փլուզման հետևանքով կան տասնյակ զոհեր

Կենտրոնաֆրիկյան Հանրապետության (ԿԱՀ) արևմուտքի Նանա Մամբերեի նահանգում ոսկու արդյունահանման հանքահորի փլուզման հետևանքով առնվազն 30 մարդ է զոհվել: «Արմենպրես»-ի փոխանցմամբ՝ այս մասին հաղորդում է The Associated Press-ը։

Գործակալության տվյալներով՝ փրկարարներին և տեղի բնակիչներին հաջողվել է մի քանի ժամվա ընթացքում փլատակներից դուրս բերել 30 մարմին։ Նշվում է, որ hանքահորում դեռ մարդիկ են մնում, սակայն նրանց թիվը հայտնի չէ։

Փլուզման պատճառների մասին չի հաղորդվում, փրկարարական գործողությունը շարունակվում է։

Միջադեպը տեղի է ունեցել Կամերունի հետ սահմանից ոչ հեռու։ Cameroun24 պարբերականը նշում է, որ փլուզումը տեղի է ունեցել Զամբուայի ոսկու արդյունահանման հանքահորում, որը գտնվում է անմիջապես երկու երկրների սահմանի վրա։ Ըստ տեղի բնակիչների՝ զոհերի թիվը կազմում է 100։

Լրատվամիջոցը նշում է, որ փրկարարներն աշխատում են բարդ պայմաններում։ Փլվածքների մաքրումը կատարվում է ձեռքով, քանի որ կան մտավախություններ, որ ծանր տեխնիկայի օգտագործումը կարող է հանգեցնել դեռևս անվնաս մնացած հանքամիջանցքների փլուզման։