2 րոպեի ընթերցում
Ուկրաինայի Գերագույն ռադան 312 ձայնով հաստատել է Եվգենի Խմարայի նշանակումը պաշտպանության նախարարի պաշտոնում։ Նա մինչ այս Պաշտպանության նախարարությունը ղեկավարում էր ժամանակավոր պաշտոնակատարի կարգավիճակով՝ հուլիսին կառավարությունում վերադասավորումներից հետո։ «Արմենպրես»-ի փոխանցմամբ՝ այս մասին հաղորդում է «ՌԲԿ-Ուկրաինա» պարբերականը։
Խմարայի թեկնածությունը խորհրդարանին էր ներկայացրել Ուկրաինայի նախագահ Վոլոդիմիր Զելենսկին օգոստոսի 18-ին։
Ռադայում քվեարկությունից առաջ Խմարան դիմել է խորհրդարանի անդամներին և հայտարարել, որ զորացրվել է զինվորական ծառայությունից և այժմ քաղաքացիական անձ է։ Նախարարի պաշտոնում իր գերակա խնդիրների շարքում նա նշել է ռազմաճակատի ամրապնդումը և զինվորականներին զենքով արագ ապահովումը, մեծ և միջին հեռահարության հարվածները ռուսական ռազմական և ռազմավարական օբյեկտներին, ուկրաինական պաշտպանական արդյունաբերության զարգացումը և զենքի արտադրության ավելացումը, զինվորականների պաշտպանությունն ու աջակցությունը, նրանց մարզումը և ծառայության արդար կանոնները, նախագահի, խորհրդարանի, կառավարության, Գլխավոր շտաբի, Պաշտպանության նախարարության, զորքերի, արտադրողների և գործընկերների միջև համագործակցության ամրապնդումը։
Խմարան ընդգծել է, որ Ուկրաինան պետք է ստանձնի ռազմավարական նախաձեռնությունը պատերազմում, իսկ այս գործում գլխավոր դեր պետք է խաղան ուկրաինական զենքը և հեռահար հարվածները։
Պաշտպանության նախարարությունում կադրային փոփոխություններն Ուկրաինայի նախագահի կողմից այս տարվա հուլիսին հայտարարված կառավարության լայնածավալ վերագործարկման հետևանք էին։ Նախորդ կառավարության հրաժարականից հետո պաշտպանության նախարար Միխայլո Ֆեդորովը նույնպես զրկվեց պաշտոնից, ինչը երկրում ցույցերի առիթ դարձավ։
Ֆեդորովի պաշտոնանկությունից հետո Զելենսկին գեներալ-մայոր Խմարային նշանակեց պաշտպանության նախարարի պաշտոնակատար։
Գերագույն ռադան քվեարկությամբ նաև արտաքին գործերի նախարարի պաշտոնում վերանշանակել է Անդրեյ Սիբիհային։