1 րոպեի ընթերցում
Իրանի գերագույն առաջնորդ Մոջթաբա Խամենեին խուսափում է հրապարակային ելույթներից` բացառապես անվտանգության նկատառումներից ելնելով։ «Արմենպրես»-ի փոխանցմամբ՝ այս մասին ամերիկյան PBS-ի (Հանրային հեռարձակման ծառայություն) հետ հարցազրույցում հայտարարել է Իսլամական հեղափոխության պահապանների կորպուսի (ԻՀՊԿ) գլխավոր հրամանատարի խորհրդական Մոհամմադ Ռեզա Նաքդին։
«Այս ռազմավարությունը նրան է պատկանում։ Մեր թշնամին հանցագործ է և չի ենթարկվում որևէ օրենքի։ Բնականաբար, դա անվտանգության նկատառումներից է բխում։ Այլ պատճառ, անշուշտ, չկա», - ասել է նա։
Այնուամենայնիվ, Նաքդին հրաժարվել է պատասխանել այն հարցին, թե արդյոք անձամբ հանդիպել է Խամենեիի հետ։
«Եկեք այս հարցը մի կողմ թողնենք», - ասել է նա։
Իրանի գերագույն առաջնորդ Ալի Խամենեին սպանվել է 2026 թ․ փետրվարի 28-ին՝ Իրանի դեմ ԱՄՆ-ի և Իսրայելի համատեղ հարձակման առաջին օրը, որից հետո նրա որդին՝ Մոջթաբա Խամենեին, նշանակվել է գերագույն առաջնորդ։
Իսլամական Հանրապետության դեմ ԱՄՆ-Իսրայել ռազմական գործողության սկսվելուց ի վեր նա երբեք հանրության առջև չի ներկայացել։
Թեհրանը բազմիցս նշել է, որ Խամենեիի առողջությունը վտանգված չէ։