Երևանում ապօրինի վճարովի ավտոկայանատեղի կազմակերպելու, գումար պահանջելու կասկածանքով 17 անձ է տեղափոխվել ոստիկանություն
1 րոպեի ընթերցում
Երևանի քաղաքապետարանի և Հայաստանի ներքին գործերի նախարարության ստորաբաժանումների համատեղ հսկողական միջոցառման արդյունքում 17 անձ է տեղափոխվել համայնքային ոստիկանության կենտրոնական բաժին։ «Արմենպրես»-ի հաղորդմամբ՝այս մասին հայտնել է Երևանի քաղաքապետարանը։
Հսկողական միջոցառումն իրականացվել է հուլիսի 11-ին։
Քաղաքապետարանի փոխանցմամբ՝ տեղափոխված անձանցից 10-ը կասկածվում է օրենսդրությամբ սահմանված պահանջների խախտմամբ վճարովի ավտոկայանատեղի կազմակերպելու, իսկ 7-ը՝ այլ անձանցից ապօրինի գումար պահանջելու կամ շորթելու մեջ։
Նրանք տեղափոխվել են համայնքային ոստիկանության կենտրոնական բաժին՝ նրանց գործողություններին իրավական գնահատական տալու և համապատասխան վարչական արձանագրություններ կազմելու նպատակով։
Քաղաքապետարանից տեղեկացրել են, որ իրավախախտում կատարած անձանց զգուշացվել է՝ հսկողական միջոցառումները շարունակական են լինելու։ Կրկնակի վարչական իրավախախտում կատարելու դեպքում նրանց նկատմամբ կկիրառվեն օրենսդրությամբ նախատեսված ավելի խիստ վարչական պատասխանատվության միջոցներ, այդ թվում՝ ավելի բարձր չափի վարչական տուգանքներ։