Բաքվի վերաքննիչ դատարանում շարունակվել է ապօրինի ազատազրկման դատապարտված հայ գերիների բողոքների քննությունը

Բաքվի վերաքննիչ դատարանում շարունակվել է Ադրբեջանում ապօրինի ազատազրկման դատապարտված հայ գերիների բողոքների քննությունը:

«Արմենպրես»-ի փոխանցմամբ՝ այս մասին գրում են ադրբեջանական լրատվամիջոցները։

Նիստի ընթացքում Լեռնային Ղարաբաղի նախկին նախագահ Արկադի Ղուկասյանը հանդես է եկել ելույթով, հերքել է իրեն առաջադրված բոլոր մեղադրանքները և հայտարարել, որ իրեն մեղավոր չի ճանաչում հոդվածներից և ոչ մեկով։

Այնուհետև ելույթ է ունեցել Վասիլի Բեգլարյանի փաստաբանը՝ դատարանին խնդրելով իր պաշտպանյալի նկատմամբ կայացնել արդարացման որոշում և չեղարկել 2026 թվականի փետրվարի 5-ի մեղադրական վճիռը։

Ճառով է հանդես եկել նաև Վասիլի Բեգլարյանը՝ հայտարարելով, որ իրեն մեղավոր չի ճանաչում առաջադրված հոդվածներից ոչ մեկով։

Լեռնային Ղարաբաղի նախկին նախագահ Բակո Սահակյանի փաստաբանը ևս ելույթ է ունեցել՝ դատարանին խնդրելով արդարացնել իր պաշտպանյալին և չեղարկել նրա նկատմամբ կայացված դատավճիռը։ Բակո Սահակյանն իր հերթին հայտարարել է, որ իրեն մեղավոր չի ճանաչում առաջադրված հոդվածներից որևէ մեկով։

Դատական հաջորդ նիստը կկայանա հուլիսի 14-ին։

Հիշեցնենք, որ 2026 թվականի փետրվարի 5-ին Բաքվի դատարանը կեղծ մեղադրանքներով ազատազրկման է դատապարտել հայ գերիներին։ Ադրբեջանական դատարանը ցմահ ազատազրկման է դատապարտել ԼՂ  նախկին նախագահ Արայիկ Հարությունյանին, պաշտպանության բանակի նախկին հրամանատար Լևոն Մնացականյանին, պաշտպանության բանակի հրամանատարի նախկին տեղակալ Դավիթ Մանուկյանին, ԼՂ խորհրդարանի նախկին խոսնակ Դավիթ Իշխանյանին և ԱԳՆ նախկին նախարար Դավիթ Բաբայանին։ ԼՂ նախկին նախագահներ Արկադի Ղուկասյանն ու Բակո Սահակյանը դատապարտվել են 20 տարվա ազատազրկման։

Ապօրինի պահվող մյուս անձինք՝ Մադաթ Բաբայանը, Մելիքսեթ Փաշայանը, Գարիկ Մարտիրոսյանը, Դավիթ Ալլահվերդյանը, Լևոն Բալայանը, Վասիլի Բեգլարյանը, Գուրգեն Ստեփանյանը և Էրիկ Ղազարյանը դատապարտվել են 15-ից մինչև 19 տարվա ազատազրկման։