Չարենցավանի համայնքային ոստիկանները թմրանյութ տեղադրողներին ձերբակալել են «Վերածնունդ» հուշահամալիրից գերեզմանոց տանող ճանապարհին

Համայնքային ոստիկանության Չարենցավանի բաժնի ծառայողները թմրանթյութ ապօրինի պահելու և իրացնելու վերաբերյալ ստացած օպերատիվ տեղեկությունն իրացրել են հուլիսի 1-ին։

«Արմենպրես»-ի փոխանցմամբ՝ այս մասին հաղորդագրություն է տարածել ՀՀ ՆԳՆ ոստիկանությունը։

Չարենցավան քաղաքի մոտ գտնվող «Վերածնունդ» հուշահամալիրից գերեզմանոց տանող ճանապարհին համայնքային ոստիկանները ձերբակալել են Արարատի մարզի Քաղցրաշեն գյուղի բնակիչ 28 և 30 տարեկան երկու երիտասարդի։ Նրանց վարած «Նիսան» մակնիշի մեքենայով հանդերձ նրանք տեղափոխվել են համայնքային բաժին։ 

Նրանց խուզարկությամբ հայտնաբերվել է 11 փաթեթ, որոնցում, ըստ երիտասարդների, մարիխուանա էր, ինչը տեղադրելու միջոցով իրացնելու նպատակով ձեռք էին բերել «Տելեգրամ»-ի մի օգտատիրոջից։

Նրանք հայտնել են, որ փաթեթներ կան նաև մեքենայում։ Չարենցավանի քննչական բաժնում նախաձեռնված քրեական վարույթի շրջանակում նույն օրը կատարված խուզարկությամբ մեքենայում հայտնաբերվել է տարբեր գույների 26 փաթեթ։ Եվս մեկ փաթեթ հայտնաբերվել է դեպքի վայրի զննությամբ։ 

Նախաքննությամբ հանգամանքները պարզվում են։