1 րոպեի ընթերցում
Շիրակի մարզի Արթիկ համայնքում ընթացքի մեջ են 2026 թվականի համայնքային ծրագրերով նախատեսված խոշորածավալ ճանապարհաշինական աշխատանքները։
Ինչպես «Արմենպրես»-ին տեղեկացրին Արթիկի համայնքապետարանից, ներկայումս հիմնանորոգվում են Արթիկ քաղաքի Անկախության, Սվերդլովի, Չարենցի և Երկաթուղայինների փողոցները: Աշխատանքներն իրականացվում են 2026 թվականի սուբվենցիոն ծրագրով:
Հիմնանորոգման ծրագրի շրջանակներում նախատեսված է իրականացնել փողոցների երթևեկելի հատվածի ասֆալտապատում, մայթերի սալիկապատում և մայթեզրերի կառուցում։ Կկառուցվեն ջրահեռացման և կոյուղատար նոր համակարգեր, ինչպես նաև կանցկացվի արտաքին լուսավորության ժամանակակից ցանց։
Աշխատանքներն իրականացնում է «Ճանշին» ՓԲԸ-ն։ Այս փուլում ակտիվորեն ընթանում են ճանապարհահատվածի հին ասֆալտի շերտի հեռացման, մայթեզրերի տեղադրման և մայթերի սալիկապատման աշխատանքները: Զուգահեռաբար կատարվում են ջրահեռացման և կոյուղատար համակարգերի կառուցման, ինչպես նաև լուսավորության նոր ցանցի մալուխների անցկացման հողային աշխատանքներ։