Թեհրանը և Վաշինգտոնը պատրաստվում են բարձր մակարդակով բանակցությունների հաջորդ փուլին
1 րոպեի ընթերցում
Շվեյցարիայում Իրանի և ԱՄՆ-ի տեխնիկական բանակցությունները, որոնք անցկացվել են միջնորդի դերում հանդես եկող Պակիստանի ու Կատարի մասնակցությամբ, ավարտվել են. կողմերը նախապատրաստել են բարձր մակարդակով հանդիպումների հաջորդ փուլը: «Արմենպրես»-ի հաղորդմամբ՝ այդ մասին հայտարարել է Իրանի արտաքին գործերի փոխնախարար Քազեմ Ղարիբաբադին։
Իրանի տեխնիկական բանակցային խմբի ղեկավար Ղարիբաբադին, ինչպես հաղորդում է իրանական Press TV-ն, «հայտարարել է չորս երկրների մասնակցությամբ տեխնիկական բանակցությունների հաջող ավարտի և բարձր մակարդակով բանակցությունների հաջորդ փուլի նախապատրաստման մասին»։
Նրա խոսքով՝ տեխնիկական խորհրդակցությունների ընթացքում ձևավորված չորս աշխատանքային խմբերը կզբաղվեն «պատժամիջոցների դադարեցմամբ, միջուկային հարցերով, վերակառուցմամբ և տնտեսական զարգացմամբ, ինչպես նաև ձեռք բերված պայմանավորվածությունների մոնիթորինգով ու իրականացմամբ»:
Լույս հունիսի 22-ի գիշերը ԱՄՆ-ն և Իրանը միջնորդի դերում հանդես եկող Պակիստանի ու Կատարի մասնակցությամբ ավարտել են բարձր մակարդակով բանակցությունները Շվեյցարիայի Բյուրգենշտոկ քաղաքում։ Այնտեղ էլ տեղի են ունեցել տեխնիկական խմբերի բանակցությունները։