Փաշինյանը Կառավարությանն առաջարկում է ունենալ հստակ առաջնահերթություններ և անշեղորեն շարժվել դրանց իրագործման ուղղությամբ

Հայաստանի Հանրապետության կառավարության հիմնական անելիքը նոր որակի պետություն ստեղծելու առաքելության շարունակությունն է և պետության վերելքը։

«Արմենպրես»-ի հաղորդմամբ՝ այս մասին հունիսի 11-ին Կառավարության նիստում հայտարարել է ՀՀ վարչապետ Նիկոլ Փաշինյանը՝ շնորհավորելով նիստի մասնակիցներին խորհրդարանական ընտրությունների անցկացման առթիվ։

«Պետությունը մարդու, քաղաքացու անվտանգությունը, բարեկեցությունը, ազատությունը ապահովելու միջոց է, և մենք պետք է գործենք այդ տրամաբանությամբ։ Մենք արդեն կսկսենք Կառավարության ծրագրի նախագծի մշակումները, որն, իհարկե, նոր Կառավարության ձևավորումից հետո պետք է հաստատվի Ազգային ժողովում»,-նշեց Նիկոլ Փաշինյանը։

Փաշինյանը նաև լավ լուր համարեց այն, որ նախկին երկու ընտրությունների դեպքերում այսքան ժամանակ չեն ունեցել ո՛չ Կառավարության կազմի, ո՛չ ծրագրի և այլ փաստաթղթերի մասին մտածելու համար, որովհետև նախորդ երկու ընտրությունները եղել են արտահերթ։  

«Կարծում եմ, որ հիմնական տրամաբանությունն ակնհայտորեն լինելու է մեր գործողությունների և անելիքների շարունակականությունը, և դրա համար այս փուլում կարևոր է նախորդող շրջանն ամբողջությամբ վերլուծել և հասկանալ, թե ինչն է, որ պետք է առավել ակտիվացնել և ինչից է, որ պետք է հրաժարվենք, և որտեղ է, որ մեր արդյունքները մեզ բավարար չեն թվում և պետք է այդտեղ ավելի մեծ ջանքեր գործադրենք»,-ընդգծեց վարչապետը։

Նա նաև հավելեց, որ իր կողմից առաջարկվել է նոր գաղափար, որով Կառավարությունն իր առաջիկա ծրագրում ունենա առաջնահերթությունների հստակ ցանկ։

«Կարևոր է, որ մենք ունենանք առաջնահերթություններ և առաջնահերթությունների առաջնահերթություններ, ինչպես, օրինակ, նախորդ Կառավարության ծրագրում հստակ նշված էր, որ բոլոր առաջնահերթությունների առաջնահերթությունը խաղաղության օրակարգն է, և մենք գերկենտրոնացած մնացինք այդ թեմայի վրա և արդյունք արձանագրեցինք։ Հիմա մենք պետք է ունենանք առաջնահերթություններ և առաջնահերթությունների առաջնահերթություններ, որպեսզի մենք ամենօրյա աշխատանքում կարողանանք հարցերի հնարավորինս սեղմ շրջանակի վրա կենտրոնացած մնալ»,-ասաց վարչապետ Փաշինյանը։

Հայաստանում հունիսի 7-ին տեղի ունեցած խորհրդարանական ընտրությունների նախնական արդյունքներով խորհրդարան են անցնում երեք քաղաքական ուժեր՝ «Քաղաքացիական պայմանագիր» կուսակցությունը, «Ուժեղ Հայաստան» դաշինքը և «Հայաստան» դաշինքը։

Նախնական տվյալներով՝ «Քաղաքացիական պայմանագիր» կուսակցությունը ստացել է 727 հազար 827 ձայն կամ 49,825 տոկոս։ Ստացած ձայների շնորհիվ կուսակցությունը խորհրդարանում մեծամասնություն կստանա և կձևավորի կառավարություն։

«Ուժեղ Հայաստան» դաշինքը ստացել է 340 հազար 088 ձայն կամ 23,281 տոկոս, իսկ «Հայաստան» դաշինքը՝ 145 հազար 113 ձայն կամ 9,934 տոկոս։

Անցողիկ շեմին՝ 4 տոկոսին, շատ մոտ է «Բարգավաճ Հայաստան» կուսակցությունը։ Նախնական արդյունքներով ԲՀԿ-ն ստացել է 3,996 տոկոս ձայն։ Խորհրդարան անցնելու համար կուսակցությանը պակասում է 0,004 տոկոսային կետ։

ԲՀԿ-ն ավելի վաղ հայտարարել էր, որ դիմելու է ԿԸՀ՝ մի շարք ընտրատեղամասերում վերահաշվարկ իրականացնելու համար։ Վերահաշվարկի անհրաժեշտության մասին հայտարարել էին նաև այլ քաղաքական ուժեր։

ԿԸՀ-ն մի քանի քաղաքական ուժերի հիման վրա վերահաշվարկ է իրականացնում ավելի քան 7 տասնյակ ընտրատեղամասերում։ Ընտրությունների վերջնական արդյունքները կհայտարարվեն հունիսի 14-ին։