2 րոպեի ընթերցում
ՀՀ վարչապետ Նիկոլ Փաշինյանը հայտարարել է, որ Գյումրի կատարած այցի ընթացքում տեսած պատկերները, մասնավորապես քաղաքի որոշ թաղամասերի բակերի և փողոցների վիճակը, իր համար եղել են անսպասելի և նույնիսկ շոկային։ «Արմենպրես»-ի հաղորդմամբ՝ գործադիր մարմնի անդամների մասնակցությամբ անցկացված խորհրդակցության ժամանակ վարչապետն անդրադարձել է Գյումրիի ենթակառուցվածքային խնդիրներին և դրանց լուծման անհրաժեշտությանը։
«Այն, ինչ տեսա Գյումրիի թաղամասերում, ճիշտն ասած, ինձ համար անսպասելի էր և նաև ինչ-որ տեղ հենց շոկային ազդեցություն ունեցավ։ Ես չէի կարող պատկերացնել, որ այն երկրում, որտեղ ես վարչապետ եմ, մասնավորապես 58-րդ թաղամասում կարող են լինել այդպիսի վիճակում գտնվող բակեր և փողոցներ, որոնք խայտառակ տեսարան են»,- ասել է Փաշինյանը։
Նրա խոսքով՝ կառավարությունը պետք է հնարավորինս արագ քայլեր ձեռնարկի առկա խնդիրները լուծելու ուղղությամբ։
«Մենք պիտի գտնենք ձևերը, որ, եթե անհրաժեշտ է, նույնիսկ շրջանցելով տեղական ինքնակառավարման մարմիններին, այնտեղ արագ գործողություններ իրականացնենք»,- նշել է վարչապետը։
Փաշինյանը հիշեցրել է նաև, որ նախկինում արդեն հայտնել էր Գյումրիում հնարավորինս արագ արտահերթ ընտրություններ անցկացնելու անհրաժեշտության մասին։
«Ես ասել եմ, որ կարծում եմ՝ Գյումրիում պետք է հնարավորինս արագ ունենանք արտահերթ ընտրություններ»,- ընդգծել է նա։
Վարչապետի խոսքով՝ ճանապարհաշինական ծրագրերի շրջանակում կառավարությունը նախատեսում է ավելացնել աշխատանքների ծավալները Գյումրիում և Երևանում։
«Այսօրվանից սկսած՝ տարեկան մեր 500 կիլոմետր ճանապարհաշինության շրջանակում տարեկան 25 կիլոմետր պետք է իրականացնենք Գյումրիում, 50 կիլոմետր՝ Երևանում»,- հայտարարել է Փաշինյանը։