Ուկրաինայի վարչապետը ժամանել է Էստոնիա՝ քննարկելու հակաօդային պաշտպանության ոլորտում համագործակցությունը
2 րոպեի ընթերցում
Ուկրաինայի վարչապետ Յուլիա Սվիրիդենկոն ժամանել է Էստոնիա, որտեղ հանդիպել է Էստոնիայի վարչապետ Կրիստեն Միխալի հետ և քննարկել, ի թիվս այլ հարցերի, անօդաչու թռչող սարքերի արտադրության և մարտական կիրառման ոլորտում համագործակցությունը։ Այդ մասին տեղեկացնում է «Արմենպրես»-ը՝ վկայակոչելով BBC-ին։
«Մենք կենտրոնացանք տեխնոլոգիաների և անօդաչու համակարգերի ոլորտում պաշտպանական համագործակցության վրա, քանի որ Ուկրաինան ներկայումս ունի անօդաչու թռչող սարքերի և հակաօդային պաշտպանության համակարգերի եզակի փորձ։ Մենք պատրաստ ենք ակտիվորեն կիսվել դրանով Էստոնիայի հետ։ Մենք նաև շնորհակալ ենք Էստոնիային՝ Ուկրաինայի վերակառուցման ծրագրերին միանալու համար, այդ թվում՝ պատերազմում ծնողներին կորցրած երեխաներ մեծացնող բազմազավակ ընտանիքների համար բնակարանների, ինչպես նաև ապաստարանների և հոգեբանական վերականգնողական կենտրոնների կառուցման համար», - ասել է Սվիրիդենկոն։
Կրիստեն Միխալն, իր հերթին, նշել է, որ Ուկրաինան այժմ դարձել է մի երկիր, որի փորձը և նորարարությունը ռազմական և պաշտպանական-արդյունաբերական ոլորտներում նպաստում են ամբողջ Եվրոպայի պաշտպանունակության ամրապնդմանը։
Միխալից բացի, նախանշված են Ուկրաինայի վարչապետի հանդիպումներն Էստոնիայի նախագահ Ալար Կարիսի և խորհրդարանի խոսնակ Լաուրի Հուսարի հետ։