Հայաստանի երկաթուղու կոնցեսիոն կառավարման տրամաբանությունը պետք է անպայման փոխենք. Փաշինյան

Հայաստանի վարչապետ Նիկոլ Փաշինյանը հայտարարել է, որ Հայաստանը ցանկանում է փոխել երկաթուղու կոնցեսիոն կառավարման տրամաբանությունը, որպեսզի պատժամիջոցային խոչընդոտները խնդիր չդառնան երկրի երկաթուղային համակարգի զարգացման համար։

Հիշեցնենք, որ Հայաստանի երկաթուղու կոնցեսիոն կառավարումը իրականացնում է Ռուսաստանը՝ «Հարավկովկասյան երկաթուղիներ» ընկերության միջոցով։ Թեմայի վերաբերյալ վարչապետ Նիկոլ Փաշինյանն ավելի վաղ էլ խոսել էր՝ նշելով, որ ռուսական կոնցեսիոն կառավարումը Հայաստանին զրկում է որոշ մրցակցային առավելություններից՝ առաջարկելով հայկական երկաթուղու կոնցեսիոն կառավարումը Հայաստանի և Ռուսաստանի համար բարեկամ որևէ երրորդ երկրի փոխանցել։ Ռուսական կողմից տարբեր պաշտոնյաներ արդեն իսկ հայտարարել են, որ երկաթուղու կոնցեսիոն կառավարումը երրորդ երկրի փոխանցելը նպատակահարմար չեն համարում։

«Արմենպրես»-ի հաղորդմամբ՝ Կոտայքի մարզի Գողթ բնակավայրի բնակիչների հետ հանդիպման ընթացքում Փաշինյանն անդրադարձել է  տարածաշրջանային հաղորդակցությունների շուրջ զարգացումներին՝ նշելով, որ Թուրքիան այժմ կառուցում է Կարս-Դիլիջու երկաթուղին՝ Կարսից մինչև Նախիջևան հատվածում, մինչդեռ Հայաստանում արդեն առկա է պատրաստի երկաթուղային ենթակառուցվածք։

«Հայաստանում պատրաստի երկաթուղի կա, և պատրաստի երկաթուղին է պետք օգտագործել»,-ասել է վարչապետը։

Փաշինյանի խոսքով՝ ուսումնասիրությունների արդյունքում Կառավարությունը եկել է եզրակացության, որ խնդիրը կապված է Հայաստանի երկաթուղու ներկայիս կոնցեսիոն կառավարման մոդելի հետ։

«Քանի որ Հայաստանի երկաթուղին ռուսական կոնցեսիայի ներքո է, և Ռուսաստանը բարդ պատժամիջոցային հարաբերություններ ունի Արևմուտքի երկրների հետ, արևմտյան երկրները փնտրում են ճանապարհներ, թե ոնց շրջանցեն դա»,-նշել է նա։

Վարչապետի խոսքով՝ միջազգային ընկերությունները փորձում են խուսափել պատժամիջոցների ռիսկից և փնտրում են անվտանգ ուղիներ։

«Մենք կարծում ենք, որ Հայաստանի երկաթուղիների կոնցեսիոն տրամաբանությունը պետք է անպայման փոխենք, որը, ի դեպ, Հայաստանի Հանրապետության 100 տոկոս սեփականությունն է։ Դա պետք է, որպեսզի պատժամիջոցային խոչընդոտը մեր ճանապարհի, մեր երկաթուղիների համար պրոբլեմ չդառնա»,- ասել է Փաշինյանը։

Նրա խոսքով՝ այս ուղղությամբ Հայաստանը շարունակելու է աշխատանքը գործընկերների, այդ թվում՝ Ռուսաստանի հետ։

Փաշինյանը նաև հայտարարել է, որ հաջորդ փուլում սպասվում է Հայաստան-Թուրքիա սահմանի և երկաթուղու բացումը։

«Բոլոր դեպքերում արևելքից արևմուտք ապրանքների հոսքն այնքան մեծ է, որ ես համոզված եմ, որ մեր երկաթուղին մեծ ծանրաբեռնվածությամբ աշխատելու է և մեծ գումարներ է բերելու Հայաստանի Հանրապետությանը»,-նշել է նա։  

Վարչապետի խոսքով՝ միջազգային գործընկերները նաև ուսումնասիրել են Հայաստանի տարածքով անցնող ճանապարհային ուղղությունները և եկել եզրակացության, որ արևելքից արևմուտք ամենակարճ ճանապարհն անցնում է Տավուշի, Լոռու և Շիրակի մարզերով։

«Մեծ ներդրումային հետաքրքրություններ կան, որպեսզի Տավուշի մարզից դեպի Շիրակի մարզ գնացող ճանապարհները զարգացվեն և բեռնատարների համար վճարովի ճանապարհներ ստեղծվեն»,- ասել է Փաշինյանը։

Նրա խոսքով՝ այդ ծրագրերը Հայաստանի համար լրացուցիչ եկամուտներ կստեղծեն։