ՀՀ ԱԳ նախարարի տեղակալն ու Եվրոպայի խորհրդի մարդու իրավունքների հանձնակատարն անդրադարձել են տարածաշրջանային վերջին զարգացումներին
1 րոպեի ընթերցում
Եվրոպայի խորհրդի 135-րդ նախարարական համաժողովի շրջանակներում Հայաստանի արտաքին գործերի նախարարի տեղակալ Ռոբերտ Աբիսողոմոնյանը հանդիպել Եվրոպայի խորհրդի մարդու իրավունքների հանձնակատար Մայքլ Օ’ֆլահերթիի հետ:
«Արմենպրես»-ին ՀՀ արտաքին գործերի նախարարությունից տեղեկացրին, որ հանդիպման ընթացքում զրուցակիցները բարձր են գնահատել Հայաստանի և Եվրոպայի խորհրդի միջև առկա արդյունավետ փոխգործակցությունը:
ԱԳ նախարարի տեղակալը վերահաստատել է ՀՀ հանձնառությունը Հայաստանում ժողովրդավարական բարեփոխումների հավակնոտ օրակարգի իրականացմանը և ներկայացրել ՀՀ կառավարության կողմից ձեռնարկվող քայլերը, այդ թվում՝ մարդու իրավունքների պաշտպանության ոլորտում:
Անդրադարձել են Ղարաբաղի հայ փախստականների կարիքների երկարաժամկետ հասցեագրմանն ուղղված ծրագրերին, և այս համատեքստում ընդգծվել է դրանց շարունակականության ապահովման կարևորությունը:
Մտքեր են փոխանակվել նաև տարածաշրջանային վերջին զարգացումների շուրջ: Ընդգծվել է Հայաստանի և Ադրբեջանի միջև հաստատված խաղաղության հետագա ինստիտուցիոնալացման անհրաժեշտությունը, ինչպես նաև առկա հումանիտար բնույթի հարցերի հասցեագրման կարևորությունը: