Թրամփը դիտարկում է իրանական նավթ գնող չինական ընկերությունների նկատմամբ պատժամիջոցների վերացման հարցը

ԱՄՆ նախագահ Դոնալդ Թրամփը հայտարարել է, որ դիտարկում է իրանական նավթ գնող չինական ընկերությունների նկատմամբ պատժամիջոցների վերացման հարցը։

«Ես որոշում կկայացնեմ առաջիկա մի քանի օրերի ընթացքում։ Մենք խոսել ենք այդ մասին», - CNN-ի փոխանցմամբ, ինքնաթիռում լրագրողներին ասել է Թրամփը՝ Չինաստան կատարած պետական ​​այցից վերադառնալիս։

«Արմենպրես»-ի փոխանցմամբ, լրագրողների հարցին, թե արդյոք Չինաստանի նախագահ Սի Ծինփինը որևէ հստակ պարտավորություն է ստանձնել ճնշում գործադրել Իրանի վրա՝ Հորմուզի նեղուցը վերաբացնելու համար, Թրամփը պատասխանել է. «Ես չեմ խնդրում դիմացինին լավություն անել, քանի որ երբ լավություն ես խնդրում, դու էլ դրա դիմաց պատասխան լավություն պետք է անես»։

Թրամփը կարծիք է հայտնել, որ Սի Ծինփինը կցանկանար տեսնելՀորմուզի նեղուցի բացումը՝ նշելով, որ Չինաստանը իր նավթի զգալի մասը ստանում է Պարսից ծոցից։

CNN-ը հիշեցնում է, որ Իրանն աշխարհի առաջատար նավթ արտադրողներից է, որը, համաձայն Kpler վերլուծական ընկերության տվյալների, 2025 թվականին օրական միջինում արտահանել է 1.69 միլիոն բարել։

ԱՄՆ կառավարության տվյալներով՝ իրանական նավթի մոտ 90%-ը գնում է Չինաստան: