Գեղարքունիքի մարզի բնակավայրերում տնկվում են դեկորատիվ ծառատեսակներ

Գեղարքունիքի մարզի Մարտունի, Գավառ, Սևան, Ճամբարակ և Վարդենիս համայնքների քաղաքային ու գյուղական բնակավայրերի կրթական ու առողջապահական հաստատությունների բակերում, հանրային վայրերում ու մայթեզրերին կատարվում է դեկորատիվ ծառատեսակների տունկ։

Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի գյուղատնտեսության և բնապահպանության վարչությունից, «Հայանտառ» ՊՈԱԿ-ի կողմից Գեղարքունիքի մարզպետի աշխատակազմին է տրամադրվել սոճի և հացենի ծառատեսակների 6879 տնկի, որոնք արդեն բաշխվել են համայնքապետարաններին։

«Տնկիները տրամադրվում են դպրոցներին ու բուժհիմնարկներին՝ բակային տարածքներում ծառատունկ կատարելու համար։ Դրանք տնկվելու են նաև մայթեզրերին ու հանրային այնպիսի վայրերում, որտեղ առաջին հերթին ոռոգման, խնամքի ու պահպանման հնարավորություն կա։ Բաշխումն արդեն ավարտված է, ծառատունկը սկսվել է ու կավարտվի առաջիկա մի քանի օրվա ընթացքում»,-ներկայացրին Գեղարքունիքի մարզպետի աշխատակազմից։