Արքայազն Հարին չհայտարարված այցով ժամանել է Կիև

Արքայազն Հարին նախապես չհայտարարված այցով ապրիլի 23-ի առավոտյան ժամանել է Ուկրաինայի մայրաքաղաք Կիև։ «Արմենպրես»-ի փոխանցմամբ, ժամանման տեսանյութը հրապարակել է բրիտանական ITV News-ը։

Բրիտանական արքայական ընտանիքի անդամը պատրաստվում է մասնակցել Կիևի անվտանգության համաժողովին, որտեղ հավաքվելու են Արևմտյան երկրների կառավարությունների ու պաշտպանական գերատեսչությունների ներկայացուցիչներ։

«Հաճելի է վերադառնալ Ուկրաինա», - ասել է արքայազն Հարին, ով Կիև է եկել Լեհաստանից՝ գնացքով։

Նա նշել է, որ իր այցը նպատակ ունի հիշեցնել մարդկանց «թե ինչի հետ է առերեսվում Ուկրաինան, ինչպես նաև աջակցելու մարդկանց ու գործընկերներին, ովքեր ամեն օր ու ամեն ժամ աննկարագրելի դժվար պայմաններում բացառիկ աշխատանք են իրականացնում»։

Այցի շրջանակում արքայազն Հարին կայցելի նաև The Halo Trust բարեգործական կազմակերպության հետ առնչություն ունեցող հաստատություններ, որոնք Ուկրաինայում զբաղվում են ականազերծմամբ։