Ունենք անձանց բավականին հաստափոր տրցակ, որոնք գործում են այլ երկրների օրակարգով․ վարչապետ Փաշինյան
1 րոպեի ընթերցում
Հայաստանի Հանրապետության վարչապետ Նիկոլ Փաշինյանի խոսքով՝ Հայաստանի իրավապահ մարմիններն ունեն անձանց բավականին հաստափոր տրցակ, որոնք, այդ մարմինների գնահատմամբ և ձեռք բերված տվյալներով, գործում են այլ երկրների օրակարգով։
«Արմենպրես»-ի հաղորդմամբ՝ վարչապետ Նիկոլ Փաշինյանն այս մասին ասաց ճեպազրույցի ընթացքում՝ անդրադառնալով վերջերս իր կողմից արված հայտարարությանը, թե Հայաստանում կան «ինոագենտներ» (խմբ․՝ այլ պետությունների շահերն ու հետաքրքրություններն առաջ մղող անձինք)։
Վարչապետը նաև նշեց, որ եթե այդ մարդիկ դեռ ազատության մեջ են, ապա դա նշանակում է, որ նրանք դեռևս այդ լրտեսության գիծը չեն հատել, բայց գործում են այդ տրամաբանության մեջ։
«Կան մարդիկ, որոնք շատ մոտիկ են այդ գծին, եզրով քայլում են։ Երբ հատեն գծերը, կլինի հակազդեցություն։ Ես այդ մարդկանց ցուցակը ունեմ՝ անուն-ազգանունով, կոնտակտներով։ Ես խոսում եմ առաջին հերթին քաղաքական դերակատարների մասին»,-ասաց Նիկոլ Փաշինյանը։