2 րոպեի ընթերցում
Շիրակի մարզում աշնանացան հացահատիկի ցանքատարածություններն ավելացել են 8300 հեկտարով: Մարզում հացահատիկային և հատիկընդեղենային մշակաբույսերի համախառն բերքն ավելացել է 227,5 հազար ցենտներով։ Հատկանշական է բերքատվության աճը. աշնանացան ցորենի միջին բերքը 21.4 ց/հա-ից հասել է 31.7 ց/հա-ի:
Ինչպես «Արմենպրես»-ը տեղեկանում է Շիրակի մարզպետի աշխատակազմից, կարկուտի հետևանքով հողօգտագործողներին պատճառված վնասների մասնակի փոխհատուցման կարգով մարզի 1546 շահառուի տրամադրվել է 264 մլն 437 հազար դրամ փոխհատուցում։
««Բուսաբուծության աջակցության 2025 թվականի» ծրագրով 3021 շահառուի հետ կնքվել է աշնանացան ցորենի ցանքատարածության պայմանագիր»,-տեղեկացրեց Շիրակի մարզպետի աշխատակազմի գյուղատնտեսության և շրջակա միջավայրի պահպանության վարչության պետ Ռոման Համայակյանն՝ ընդգծելով անասնաբուծության ոլորտի ձեռքբերումները, մասնավորապես՝ թռչնագլխաքանակի աճը շուրջ 80 հազար թևով և Աշոցք ու Ախուրյան համայնքների կողմից 67.4 մլն դրամ արժողությամբ շարժական սպանդանոցների ձեռքբերումը։
Միևնույն ժամանակ մարզում գործում են պետական աջակցության լայնածավալ ծրագրեր։ 2026 թվականի համար նախատեսված են նաև նոր փոխհատուցումներ՝ գարնանացան հացահատիկի յուրաքանչյուր հեկտարի համար 70 000 դրամ, իսկ կերային մշակաբույսերի համար՝ մինչև 110 000 դրամի չափով։