Աֆղանստանի և Պակիստանի սահմանին վերսկսվել են մարտական ​​բախումները՝ բանակցությունների ֆոնին

Աֆղանստանի և Պակիստանի զինվորականների միջև ապրիլի 2-ի երեկոյան ակտիվ մարտական ​​բախումներ են սկսվել, այսպես կոչված, Դյուրանդի գծի երկայնքով (խմբ.՝ Աֆղանստանի և Պակիստանի միջև սահմանը չի ճանաչվում Քաբուլի կողմից) և շարունակվել մինչև ապրիլի 3-ի առավոտյան: «Արմենպրես»-ն այս մասին տեղեկանում է «ՌԻԱ Նովոստի» գործակալությունից։

«Աֆղանստանի Իսլամական Էմիրության ուժերը, ի պատասխան պակիստանցի զինվորականների հրետակոծության, Դյուրանդի գծի երկայնքով ընկած նրանց դիրքերի վրա են գրոհել Խոստի և Պակտիայի նահանգներից», - մեջբերում է գործակալությունը Seda-e Afghan Telegram ալիքի հաղորդագրությունը։

Ըստ Աֆղանստանի իշխանությունների՝ պակիստանցի զինվորականներն ապրիլի 2-ի երեկոյան ակտիվ ականանետային և հրթիռային գնդակոծություններ են սկսել աֆղանական Կունարի, Պակտիկայի և Խոստի նահանգների վրա։ Աֆղանստանի քաղաքացիական օբյեկտների վրա հարձակումների ժամանակ գործարկվել են անօդաչուներ։ Կան զոհեր և վիրավորներ, այդ թվում՝ երեխաներ։

Աֆղանստանի և Պակիստանի միջև լարվածության նոր փուլը տեղի է ունենում այն ​​ժամանակ, երբ երկու երկրների բարձրաստիճան պատվիրակությունները Չինաստանի միջնորդությամբ Ուրումչի քաղաքում բանակցությունների հերթական փուլն են անցկացնում սահմանում ստեղծված իրադրության խաղաղ կարգավորման շուրջ:

Ինչպես ճեպազրույցի ժամանակ հայտարարել է Չինաստանի արտաքին գործերի նախարարության պաշտոնական ներկայացուցիչ Մաո Նինը, համատեղ խորհրդակցությունների գործընթացը կայուն առաջընթաց է գրանցում։