3 րոպեի ընթերցում
Լեհաստանի «Telewizja Polska» (TVP) հեռուստաընկերությունը գործարկել է հայալեզու «VT Hayastan News» լրատվական ծառայությունը՝ նպատակ ունենալով Հայաստանում և արտասահմանի հայ համայնքներում բարձրացնել հանրության դիմադրողականությունը մանիպուլյացիաների և տեղեկատվական միջամտության նկատմամբ։
Այս մասին «Արմենպրես»-ը տեղեկացավ Լեհաստանի արտաքին գործերի նախարարության պաշտոնական կայքէջում տարածված հաղորդագրությունից։
Հայալեզու ծառայության խմբագիր, հաղորդավար Ռազմիկ Մարտիրոսյանը մանրամասնեց, որ նախագիծը նպատակ ունի եվրոպական տեսանկյունից ներկայացնել քաղաքական, սոցիալական և տնտեսական իրադարձությունները, նպաստել Հայաստանում Եվրոպական Միության վերաբերյալ իրազեկվածության բարձրացմանը, ինչպես նաև Լեհաստանի հետ համագործակցության ամրապնդմանը։
«Որպես ամենամեծ նպատակ նշվում է նաև ապատեղեկատվության դեմ պայքարը և հիմնականում ժողովրդավարական արժեքների վրա շեշտադրում կատարելը»,-ներկայացրեց Մարտիրոսյանը՝ հավելելով, որ «VT Hayastan News»-ը ստեղծվել է Լեհաստանի հանրային հեռուստաընկերության TVP-ի Միջազգային մեդիա կենտրոնի շրջանակներում և իրականացվում է երկրի Արտաքին գործերի նախարարության աջակցությամբ։
Նախագծի առաքելությունն է նաև բարձրացնել հանրության դիմադրողականությունը մանիպուլյացիաների և տեղեկատվական միջամտության նկատմամբ, ինչպես նաև հակազդել Հայաստանին և նրա գործընկերներին ուղղված ապատեղեկատվությանը։
Ծրագիրը եթերում կլինի շաբաթական հինգ օր, իսկ հաղորդումների տևողությունը նախատեսված է 18-20 րոպե։
Մարտիրոսյանի հավաստմամբ՝ դրանցում, չեզոք մոտեցմամբ, կներառվի տեղեկատվություն Հայաստանի ներքաղաքական իրավիճակի վերաբերյալ, կապահովվի բազմակարծությունն ու բազմավեկտորությունը, ինչպես նաև կներկայացվի փաստահեն լրատվություն։
«VT Hayastan News» լրատվական թիմը կազմված է հայ լրագրողներից, նրանցից են՝ Ռազմիկ Մարտիրոսյանը, Հարություն Ոսկանյանը և Նունե Գևորգյանը։
«Աշխատում ենք Վարշավայից։ Լեհաստանում այս պահի դրությամբ ունենք 5 աշխատակից, իսկ Հայաստանում ևս 3-4 թղթակից»,-ասաց հայալեզու հաղորդման խմբագիրը։
«VT Hayastan News»-ի ծրագրերը կհեռարձակվեն «Belsat» հեռուստաալիքով՝ երկուշաբթիից ուրբաթ, հասանելի կլինեն YouTube-ում և Facebook-ում։