Թրամփը հայտարարել է, որ կցանկանար իր ձեռքը վերցնել Իրանի նավթը

ԱՄՆ նախագահ Դոնալդ Թրամփը հայտարարել է, որ կցանկանար իր ձեռքը վերցնել Իրանի նավթը։ «Արմենպրես»-ի փոխանցմամբ՝ այս մասին նա ասել է The Financial Times-ին տված հարցազրույցում։

Թրամփը հայտնել է, որ իր «նախընտրությունը կլինի նավթը վերցնելը»։ Նա այս հնարավոր քայլը համեմատել է ԱՄՆ-ի կողմից Վենեսուելայի նավթարդյունաբերությունը վերահսկելու նկրտումների հետ՝ հունվարին այդ երկրի նախագահ Նիկոլաս Մադուրոյի ձերբակալությունից հետո։

«Անկեղծ ասած՝ ինձ համար նախընտրելի է վերցնել Իրանի նավթը, բայց ԱՄՆ-ում որոշ հիմար մարդիկ ասում են. «Ինչո՞ւ եք դա անում»։ Բայց նրանք հիմար մարդիկ են», - ասել է Թրամփը The Financial Times-ին։

Թրամփը նաև չի բացառել ամերիկյան ուժերի կողմից Խարգ կղզին գրավելու հնարավորությունը։

Հենց Խարգ կղզով է անցնում նավթահումքի արտահանման մոտ 90%-ը։ Իրանի ափամերձ այս փոքրիկ հանքավայրը Թեհրանի համար տնտեսական կենսական նշանակություն ունի և կարող է դառնալ ԱՄՆ-ի հնարավոր ցամաքային գործողության թիրախ։

Ըստ Kpler վերլուծական հարթակի տվյալների՝ այն ունի մոտ 31 միլիոն բարել նավթի պահեստավորման գնահատված հզորություն և մարտի սկզբին գործում էր իր հնարավորությունների 58%-ի չափով։

ԱՄՆ-ն մարտի 13-ին հարվածներ էր հասցրել Խարգ կղզում գտնվող ռազմական օբյեկտներին, իսկ Կենտրոնական հրամանատարությունը հայտարարել էր, որ հարված է հասցվել 90 թիրախի, այդ թվում՝ ծովային ականների պահեստների, հրթիռների պահման բունկերների և բազմաթիվ այլ ռազմական օբյեկտների։