1 րոպեի ընթերցում
Ֆրանսիան ամերիկյան ինքնաթիռներին ժամանակավորապես թույլատրել է օգտագործել իր ռազմակայանները Մերձավոր Արևելքում: «Արմենպրես»-ի փոխանցմամբ՝ այս մասին հաղորդել է AFP գործակալությունը՝ վկայակոչելով հանրապետության Զինված ուժերի Գլխավոր շտաբին:
«ԱՄՆ-ի հետ մեր հարաբերությունների շրջանակներում նրանց թռչող սարքերի ներկայությունը ժամանակավորապես թույլատրվել է տարածաշրջանում գտնվող մեր ռազմակայաններում», - մեջբերում է գործակալությունը Գլխավոր շտաբի ներկայացուցչին:
Նրա խոսքով՝ «այդ ինքնաթիռներն օգնում են Ֆրանսիայի գործընկերների պաշտպանությանը տարածաշրջանում»: Թե հատկապես որ ռազմակայանների մասին է խոսքը, չի նշվում:
Ավելի վաղ Մեծ Բրիտանիան ևս թույլ է տվել ԱՄՆ-ին օգտագործել իր տարածաշրջանում իր ռազմակայանները։
Իսկ Իսպանիան ԱՄՆ-ին թույլ չի տվել օգտագործել երկրի տարածքում գտնվող ռազմակայաններն Իրանում գործողությունների համար: Ի պատասխան՝ ԱՄՆ նախագահ Դոնալդ Թրամփը հայտարարել է, որ Միացյալ Նահանգները մտադիր է խզել բոլոր առևտրային հարաբերությունները թագավորության հետ: Ֆրանսիայի նախագահ Էմանուել Մակրոնն Իսպանիայի վարչապետ Պեդրո Սանչեսին համերաշխություն է հայտնել ԱՄՆ սպառնալիքների առնչությամբ: